Иван Готовцев: «2026 сылга сыал-сорук улахан»

Мас-рестлиҥҥэ РФ сүүмэрдэммит хамаандатын сүрүн тренерэ, “Чемпионнар баалларыгар” Россия үтүөлээх тренерэ аатынан наҕараадаламмыт уонна күрэс төрүт көрүҥнэригэр 2025 сыл бастыҥ спортсмена буолбут Айсиэн Мигалкин тус тренерэ Иван ГОТОВЦЕВ:

-Иван Степанович, ааспыт сыл мадьыныларга ситиһиилээх буолла, эн сыралаах үлэҥ сыаналанна. Баһаалыста дьэ, бу үөрүүлээх түгэҥҥэ эйиэхэ туох санаалар үөскээбиттэрэй?

—2025 сылга Россия мас-рестлиҥҥэ хамаандата ситиһиилэннэ. Ол курдук, улахан дьоҥҥо аан дойду чемпионатыгар уонна оҕолорго аан дойду күрэхтэһиитигэр биһиги бастаабыппыт. Европа чемпионата Словакияҕа буолбута. Онно үп-харчы көстүбэккэ, ситэтэ суох састаабынан кыттан, кыргызтар кэннилэриттэн иккис буолбуппут. Россия киин регионугар чуваштар, башкирдар, оттон Кавказтан – кабардиннар, осетиннар мас-рестлининэн күүскэ дьарыктанан эрэллэр.

Аан дойду чемпионатыгар саамай улахан ситиһиилээх уолаттарым Айсиэн Мигалкин, Айсен Атастыров, Семен Заболоцкай уонна Уус Алдантан киэн туттар ыччаппыт Дмитрий Попов буолар. Айсен Атастыров бэйэтэ тренер, кини эрчийэр уолаттара Василий Захаров, Егор Свинобоев эмиэ үчүгэйдик күрэхтэһэ сылдьаллар.

Үүммүт сылга бастакы сүрүн күрэхтэһиибит – Саха сирин чемпионата. Онно ситиһиилээхтик кыттыбыттар республика сүүмэрдэммит хамаандатын састаабыгар киирэн, Россия чемпионатыгар кыттыахтара. Чемпионат Нерюнгрига буолара быһаарыллыбыта. Күүстээхтэр бары кыттыахтара. Ону тэҥэ быйыл Кыргызстаҥҥа «Кочевниктар оонньууларыгар» кыттыахпыт.

Петр ПАВЛОВ.