Бөҕөстөрбүт кыайыы көтөллөннүлэр

Беларусь Республикатын, Сойуус саҕаттан аатырбыт «Стайки» спортивнай базатыгар, спорт маастардара, бырааттыы Колошколар бириистэригэр көҥүл тустууга бэтэрээннэргэ аһаҕас күрэхтэһии ыытылынна. Бу түһүлгэҕэ саха тустууга кыһатын иитиллээччилэрэ эмиэ кытыннылар.

Сылын аайы үгэс быһыытынан ыытыллар күрэхтэһиигэ быйыл Беларусь, Казахстан, Монголия уонна Россия бөҕөстөрө күүстэрин холоспуттар. Россия чиэһин Саха сирин, Бурятия, Дагестан, Тыва спортсменнара көмүскээбиттэр. Итиэннэ, ситиһиилээхтик кыттыбыттар диэххэ сөп.

Ол курдук, спорт маастара Михаил Захаров А дивизиоҥҥа (35-40 саастаахтарга) 62 киилэҕэ тустан кыһыл көмүс мэтээли ылары ситистэ. Кини ыйааһыныгар үс кыттааччы баарынан, киирсиилэр барыларын кытта сирэй көрсүүнэн ыытыллыбыттар. Онуоха Михаил утуу-субуу Беларусь уонна Казахстан бөҕөстөрүн туһааннааҕынан 5:0 уонна 7:0 ахсааннарынан итэҕэтиилээхтик кыайталаабыт.

Хапсыһыы видеоларын уонна наҕараадалааһын түгэнин «Дьулурҕан» хаһыат телеграмҥа каналыгар t.me/dzulurgan көрүөххүтүн сөп.

—Бу күрэхтэһиигэ кыттарбар миэхэ тренеринэн доҕорум Василий Софронов уонна быраатым Дамир Эркинов бииргэ сылдьыһан, күүс-көмө буолбуттарыгар махтанабын. Инники сыалым диэн – Россия чемпионатыгар ситиһиилээхтик кыттыы буолар, — диир сэмэйдик Михаил.

Санатан эттэххэ, кини былырыыҥҥыттан тустууга дьарыгын сөргүтэн, Саҥа дьыл аҕай иннинэ Кыргызстаҥҥа ыытыллыбыт норуоттар икки ардыларынааҕы турнирга эмиэ кыайыы көтөллөммүтэ. Россия, Европа эдэрдэргэ күрэхтэһиилэригэр миэстэлэһэ сылдьыбыт Михаил Захаровы кыра эрдэҕиттэн тренердэр: Иван Николаевич Сивцев, Степан Петрович Сивцев, Семен Семенович Сивцев, Петр Афанасьевич Соловьев эрчийбиттэрин, үтүөтүк ахтар.

Ити курдук, Минскэй көбүөрүгэр өссө Вячеслав Стрекаловскай В дивизиоҥҥа 78 киилэҕэ эмиэ тэҥнээҕин булбакка, пьедестал үрдүкү үктэлигэр таҕыста. Оттон үһүс кыттааччыбыт — Терентий Халгаев В дивизиоҥҥа 70 кг ыйааһыҥҥа үһүс бириистээх миэстэни ылла.

Бөҕөстөрбүт ситиһиилээхтик кыттыбыттарынан эҕэрдэлиибит, инникитин өссө кыайалларыгар-хотоллоругар, сыалларын-соруктарын ситиһэллэригэр баҕарабыт!

Петр ПАВЛОВ.