Улахан түһүлгэҕэ бэлэмнэнии чэрчитинэн…

Уус Алдан улууһун Суотту сэлиэнньэтигэр ахсынньы 26 күнүгэр көҥүл тустууга Саха сирин 7, Манчаары спартакиадатын хапсаҕайга 3, бэтэрээн-маастардарга аан дойду чемпионатын 2 төгүллээх кыайыылааҕа, Саха АССР, РСФСР, ССРС спордун маастара, Саха Республикатын үтүөлээх тренерэ Анатолий Николаевич Константинов кэриэһигэр көҥүл тустууга республикатааҕы XIII турнир ыытылынна.

Күрэхтэһии үөрүүлээх аһыллыытыгар Уус Алдан улууһун баһылыга Василий Алексеев, Суотту нэһилиэгин баһылыга Василий Баишев, А.Н. Константинов бииргэ төрөөбүт быраата, ССРС спордун маастара, СР үтүөлээх тренерэ Николай Константинов, көҥүл тустууга ССРС спордун маастардара Михаил Друзьянов, Прокопий Иванов, Яков Заровняев, СР култууратын үтүөлээх үлэһитэ Татьяна Гоголева, РФ студеннарга спортивнай сойууһун вице-президенэ Александр Черкашин кыттыыны ылан бэйэлэрин ахтыыларын оҥордулар, санааларын үллэһиннилэр, өйдөбүнньүк бэлэхтэрин туттардылар. Күрэхтэһии кыттыылаахтарыгар туһаайан, тохсунньу бүтүүтэ Красноярскайга буолар Иван Ярыгин аатынан көҥүл тустууга норуоттар икки ардыларынааҕы тустууга ситиһиилээхтик тусталларыгар баҕардылар.

Бу күн тустуу бырааһынньыгар Суотту бочуоттаах ыалдьыттарынан өссө үөһэ ааттаммыттары тэҥэ, көҥүл тустууга аан дойду чемпиона Герман Контоев, Саха сирин уонна Россия үтүөлээх тренерэ Степан Петрович Сивцев, спорт маастара, үтүөлээх тренер Михаил Михайлович Каженкин, А.Н. Константинов төрөппүт кыыһа Ньургуйаана Анатольевна уо.д.а. буоллулар.

Күрэхтэһии Анатолий Константинов бэйэтэ сүүрэн-көтөн туттарбыт саалатыгар – күннээн-күөнэхтээн туста сылдьыбыт 62, 68 уонна 74 кг ыйааһыннарыгар тэрилиннэ. Кыттааччы уонна ыйааһын төһө да аҕыйаҕын үрдүнэн, күрэхтэһии хаамыытын сырдатааччы Валериан Неустроев эппитинии, кытаанах, тыҥааһыннаах тустуулар буоллулар. Сотору буолар Ярыгин турнирын иннинэ бөҕөстөр сытыы хапсыһыылары ыытан, бэлэмнэниилэрин ситэрэн-хоторон биэрдилэр.

Күрэхтэһии түмүк көрдөрүүтэ:

62 кг (8 кыттааччы): 1. Петр Константинов (Бүлүү), 2. Дамир Явловскай (Чурапчы), 3. Данил Мохначевскай, 4. Максим Григорьев (иккиэн Уус Алдан), 5. Уйгун Степанов, 6. Алексей Фокинов (иккиэн – Дьокуускай).

68 кг (5): 1. Владислав Кривошапкин (Мэҥэ Хаҥалас), 2. Эдуард Попов (Чурапчы), 3. Манчаары Ильинов (Горнай), 4. Дмитрий Винокуров (Уус Алдан), 5. Сэмэн Сивцев (Дьокуускай).

74 кг (3): 1. Игорь Матвеев (Нам), 2. Айсен Потапов (Дьокуускай), 3. Айкар Марков (Мэҥэ Хаҥалас).

Хапсыһыылар түмүктэринэн спонсордар көмөлөрүнэн ыйааһыннарыгар бастаабыттар – 30, иккистээбиттэр – 20, үһүс буолбуттар – 10 тыһ. солк. харчынан наҕараадаланнылар. Түһүлгэ биир ураты түгэнинэн, ыйааһыннарыгар бастаабыттар уонна иккистээбиттэр тахсан, сүрүн бириис – телевизор ылар иһин, лотерея тардыылара буолла. Маныаха 62 киилэҕэ бастаабыт Петр Константинов күүстээх бөҕөс буоларын таһынан, тарбаҕар талааннааҕын көрдөрдө.

Ону тэҥэ күрэхтэһии чэрчитинэн хапсаҕайга муҥутуур кыайыылааҕы быһаарар түһүлгэ буолла. Онуоха быһаарыылаах хапсыһыыга Игорь Матвеев уонна Айсен Потапов көрсүһүүлэригэр, Нам ыччата утарсааччытын атаҕыттан ылан охторон кыайыылаах аатын ылла уонна сүрүн бириис быһыытынан булт саатын ылар кыахтанна. Оттон иккис миэстэлэммит Потапов быһах бирииһинэн бэлиэтэннэ.

Күрэхтэһии тэриллиитигэр – үс тустуу маастара, үтүөлээх тренер Иннокентий Андреевич Халдеевка эрчиллэ сылдьыбыт спорт бэтэрээннэрин “Халдеев уолаттара” диэн бөлөҕө хаһан баҕарар буоларыныы, бириис туруоран көхтөөхтүк кыттыбытын бэлиэтиир оруннаах.

Манна сыһыары тутан эттэххэ, Игорь Матвеев – А.Н. Константинов быйылгы күрэхтэһиитигэр көҥүл тустууга уонна хапсаҕайга тэҥнээҕин булбакка, бастыҥ бөҕөһүнэн буолла диэххэ сөп. Кини соторутааҕыта Красноярскайга, Д.Г. Миндиашвили кэриэһигэр Бүтүн Россиятааҕы турнирга ситиһиилээхтик кыттан, Ярыгин турнирыгар кыттар быраабы ылбыта. Ити түһүлгэҕэ бэйэтиттэн аҕа саастаах уонна быдан үөрүйэхтээх утарсааччыларын итэҕэтиилээхтик кыайталаабыта.

PS: күрэхтэһии видеоларын “Дьулурҕан” хаһыат t.me/dzulurgan телеграмҥа каналыгар көрөргүтүгэр.

Күрэхтэһии – Суотту нэһилиэгин дьаһалтатын (баһылык В.П. Баишев), Уус Алдан улууһун спорка управлениетын (начаалынньык Е.П. Алексеев) уонна Константиновтар дьиэ кэргэттэрин күүстэринэн тэрилиннэ. Кыттыылаахтар уонна бочуоттаах ыалдьыттар кинилэргэ уонна итии аһылыгы тэрийбит олохтоох оскуолаҕа (дириэктэр И.М. Петухова) махталларын тиэрдэллэр! Биллиилээх бөҕөс Анатолий Константинов аатын үйэтитии өссө сайдан, кэҥээн, тупсан иһэригэр өссө түмсүүлээх буолуохха диэн сүбэлэстилэр уонна икки сылынан – Анатолий Николаевич 75 сааһыгар анаан күрэхтэһиини өссө үрдүк таһымнаахтык тэрийэн ыытарга сыал-сорук туруоруннулар.

Петр ПАВЛОВ.

Ааптар хаартыската.