Тустууга саҥа саала аһылынна

Ахсынньы 23 күнүгэр — М.Е. Николаев аатынан Дьокуускай куорат 40 №-дээх оскуолатыгар дьоро күн буолла. Манна, «Тустууну – оскуолаҕа» Бүтүн Россиятааҕы бырайыак чэрчитинэн тустуу дьоҕус саалата үлэҕэ киллэрилиннэ.

Үөрүүлээх тэрээһиҥҥэ Саха Республикатын физическэй култуураҕа уонна спорка миниистирэ Леонид Спиридонов, Дьокуускай куорат баһылыгын солбуйааччы Владимир Аржаков, куорат спорка управлениетын начаалынньыга Эдуард Ефимов, Россия спортивнай тустууга эппиэттээх үлэһитэ Петр Юмшанов, оскуола дириэктэрэ Галина Васильева, анал байыаннай дьайыы дьоруойдара Андрей Григорьев, Алексей Петров, «Биир ньыгыл Россия» партияттан Надежда Селютина, куорат оскуолаларын дириэктэрдэрэ, уо.д.а. бочуоттаах ыалдьыттар кыттыыны ыллылар.

Бэлиэ түгэҥҥэ Россия спортивнай тустууга федерациятын эппиэттээх үлэһитэ, дойду үтүөлээх маастара уонна үтүөлээх тренерэ Петр Петрович Юмшановка элбэх эҕэрдэ уонна махтал тыллара ананнылар. Кини, Саха сиригэр бу ахсыс оскуолаҕа тустуу саалата аһыллыытыгар көмөлөөх.

Үөрүүлээх тэрээһин оскуола саалатыгар саҕаланан баран, тустуу саалатыгар салҕанна. Манна тренердэринэн ССРС спордун маастара Владимир Копырин, Россия спордун маастара Эрчим Челбердинов үлэлииллэр. Кинилэр билиҥҥитэ 70 эдэр бөҕөһү эрчийэллэр эбит. Бэлиэ түгэҥҥэ кэлбит дьоннор, тустуу саалата үчүгэйдик үлэлииригэр, эдэр чемпионнар үүнэн тахсалларыгар баҕардылар.

Манна сыһыары тутан эттэххэ, куорат саамай улахан оскуолатыгар бу иннинэ өссө бокса саалата аһыллыбыта. Бу оскуола үөрэнээччилэрэ спорка сыстаҕастар. Онон маннык саалалар аһыллаллара кинилэргэ сүрдээх үөрүүлээх. Итиэннэ оҕолор төрөппүттэрэ көхтөөхтөрө, оскуола олоҕор күүс-көмө, өйөбүл буолаллара киһини астыннарар.

Саҥа саала тренерэ Владимир Семенович Копырин:

—Тустуу саалатын аһыы тэрээһинигэр бэлэмнэнии күүстээхтик саҕаламмыта. Маҥнай П.П. Юмшанов оскуолабытыгар Москваттан анал сакааһынан тустуу көбүөрүн ыыппыта. Онон өрөбүл күннэргэ төрөппүттэр көмөлөрүнэн саалабытын оҥорбутунан барбыппыт. Оттон оскуола үлэһиттэрэ көмөлөөн, син этэҥҥэ бүтэрэн, тустуубут саалатын арыйдыбыт. Оскуолабыт дириэктэрэ Галина Прокопьевна салайыытынан улахан тэрээһиммит үчүгэйдик ааста. Бары кэлбит ыалдьыттарбыт махтанан, астынан бардылар. Петр Юмшанов маннык тустуу саалаларын арыйтарара – кэскиллээх суол, элбэх оҕо дьарыктанан, Саха сирин инникитэ үүнэн тахсар. Биһиэхэ Дьокуускай куорат тустууга федерациятын салайааччыта Н.К. Адушинов, 3 №-дээх спортивнай оскуола дириэктэрэ В.В. Уйгуров күүстээх көмөнү оҥордулар.

Төрөппүт Станислав Петрович Егоров: «Бу оскуолаҕа икки оҕом дьарыктанар. Биирэ көҥүл тустууга, иккиһэ боксаҕа. Быйыл мэр кубогар сэттис кылааска үөрэнэр Айсен Петухов 63 киилэҕэ чемпион үрдүк аатын сүкпүтэ. Оттон иккис кылааска үөрэнэр Уйгулаан Егоров көҥүл тустууга саҥардыы дьарыгын саҕалаата уонна үөрэ-көтө үчүгэйдик сылдьар.

Биһиги бу саҥа оскуолаҕа кэлэн үөрдүбүт аҕай. Оскуола дириэктэрэ Галина Прокопьевна үчүгэй, аһаҕас салайааччы эбит. Төрөппүттэри түмэр, биир санаанан үлэлиир. Бу күһүн дьаарбаҥка кэмигэр тренердэри мунньан, хас биирдии оҕо ханнык спорт көрүҥүнэн дьарыктаныан баҕарарын суруттарыыны тэрийбитэ. Оскуолабытыгар боксаҥа уонна тустууга анал саалалаахтара наһаа үчүгэй. Онно барытыгар биһиги, төрөппүттэр түмсэн көмөлөһөбүт. Тренер Владимир Копырин наһаа сэмэй, кыһалҕатын ыһа-тоҕо кэпсии сылдьыбат. Ону, маат тэлгии кэлэ сырыттахпытына, спонсор буллахпына, таҥас ыйыыр сир оҥотторуом диирин истэн, оҕом манна дьарыктанарын быһыытынан, бэйэм булан-талан оҥоттордум». 

Петр ПАВЛОВ.

Ааптар хаартыската.