Сылаҥҥа тустуу уораҕайа аанын тэлэччи арыйда

Ахсынньы 23 күнүгэр Сылаҥ нэһилиэгэр тустуу саҥа уораҕайа үөрүүлээх быһыыга-майгыга аанын тэлэччи арыйда.

Бу уораҕайга биллиилээх тустуук, Сылаҥтан маҥнайгы спорт маастара Иннокентий Иннокентьевич Протодьяконов аата иҥэрилиннэ. Икки мэндиэмэннээх уораҕай маҥнайгы этээһэ саха төрүт көрүҥэр мас тардыһыытыгар ананна, ону сэргэ фитнес саала баар буолла. Иккис этээскэ тустуу көбүөрэ нэличчи тэлгэннэ.

Олохтоохтор эт-хаан, доруобуйа бөҕөргөтөр, эдэр кэнчээри ыччакка кэлэ кэскили түстүүр дьиҥнээх киин буоларыгар эрэнэбит.

«Норуот күүһэ — көмүөл күүһэ» диэн этиинэн эрэллээхтик  салайтаран олохтоох дьаһалта, төрөөбүт дойдуларыгар бэриниилээх дьон көмөтүнэн үлэлэр ыытылланнар, бу баараҕай тутуу олоххо киирдэ! Саҥа уораҕай тутуутугар кыттыбыт, көмөлөспүт, өйөөбүт, тирэх буолбут, үтэн биэрбит хас биирдии киһиэхэ муҥура суох барҕа махталбытын тиэрдэбит!

Аһыллыы күн оҕолорго мас тардыһыы уонна көҥүл тустуу күрэхтэрэ буоллулар. Манна Дириҥ, Чурапчы, Төлөй уонна Сылаҥ нэһилиэктэрин хамаандалара табаарыстыы көрсүһүүлэрэ буолла. Быыппастар быччыҥнаах мадьынылар, сылбархай хапсыһыылаах тустуук уолаттар тыҥааһыннаах киирсиилэрин мустубут дьон-сэргэ ортотугар көрдөрөн үөрүүнү үксэттилэр.

Бу саҥа саалаҕа элбэх оҕо дьарыктанан, күүстээх, доруобай өйдөөх-санаалаах, Ийэ дойдутун үрдүктүк сыаналыыр дьон буола үүнэн тахсалларыгар баҕарабыт!

Биир дойдулаахпыт Иннокентий Иннокентьевич Протодьяконов аата өрүү ааттана туруохтун! Бу саала Сылаҥ дьонун тирэҕэ, эт-хаан өттүнэн сайдар хонуута буолуохтун!

Зинаида ДЬЯЧКОВСКАЯ.

Чурапчы.