Спартакиадаҕа аҕыс нэһилиэк күөн көрүстэ

Бүгүн, ахсынньы 9 күнүгэр Үөһээ Бүлүү улууһугар – Аҕа дойду дьоруойдарын күнүгэр «Үс Хоһуун» успуорт саалаҕа Арассыыйаҕа Аҕа дойдуну көмүскээччилэр, Үөһээ Бүлүү улууһугар дойдуга бэриниилээх буолуу сылыгар аналлаах тэрээһин буолла.

Ол курдук, доруобуйаларынан  хааччахтаах дьон спартакиадаларыгар аҕыс нэһилиэктэн ох курдук оҥостон, сарсыардаттан үөрэ-көтө мустан, сэттэ көрүҥҥэ спортсменнар эрбии биитинии эристилэр.

Спартакиада параадын буулдьанан ытыы тренерэ Л.В. Карадчин салайда.

Олоххо тардыһыылаах, күүстээх санаалаах спортсменнарга Трофим Миронов алгыһын анаата. Ол кэннэ  тэрээһин кыттыылаахтарын Үөһээ Бүлүү улууһун баһылыгын социальнай боппуруостарга солбуйааччы А.М. Уларова, Социальнай харалта управлениетын начальнига З.В. Егомина эҕэрдэлээтилэр. Сыллата улуустааҕы доруобуйаларынан хааччахтаах дьон спартакиадаларын эрдэттэн былааннаан тэрийэр уопсастыба салайааччыта З.С. Петрова декада тэрээһиннэрин билиһиннэрдэ уонна кэлэр сылга өрөспүүбүлүкэтээҕи “Дьулуур” спартакиадаҕа бэлэмнэнии саҕаламмытын иһитиннэрдэ. Күрэхтэһии ыытыллар хаамыытын успуорт управлениетын салайааччытын солбуйааччы М.И. Яковлев билиһиннэрдэ.

Түмүккэ быйылгы спартакиадаҕа төрдүс төгүлүн кыайыылаах үрдүк ааты Хоро нэһилиэгин хамаандата ылла, II миэстэ Үөһээ Бүлүү сүүмэрдэммит хамаандата, III бочуоттаах миэстэҕэ Нам нэһилиэгин хамаандата тигистэ.

Доруобуйаларынан хааччахтаах спортсменнар ыалдьары, кыһалҕаны умнан сөбүлүүр көрүҥнэригэр көхтөөхтүк кытталлара, ылбыт кирбиилэрин куоһараллара, кыайан-хотон үөрэллэрэ киһини эрэ сөхтөрөр, чэгиэн-чэбдик олоххо көҕүлүүр. Ыарыыны, дьарҕаны кытта туруулаһар, тулуурдаах, дьулуурдаах спортсменнарга ситиһиини, этэҥҥэ буолууну баҕарабыт!

Сайын САВВИНОВА.

Үөһээ Бүлүү.