Сир-дойду киһинэн киэркэйэр

Ахсынньы 5 күнүгэр Найахыга, Тиит Буурай аатынан күрэс уораҕайыгар бэлиэ күн буолан ааста. Уус Алдан улууһун нэһилиэктэрин икки ардыларыгар ыытыллар комплекснай спартакиадатын чэрчитинэн улуус көҥүл тустууга чемпионатын көбүөрэ тэлгэннэ.

Күрэхтэһиигэ 11 хамаандаттан барыта 62 бөҕөс күөн көрүстэ. Кинилэр уон ыйааһыҥҥа ким бастыҥын быһаарыстылар, нэһилиэктэригэр төһүү күүс буоллулар. Бу күн бэлиэ түгэнинэн найахылар бэйэлэрин уоллара – көҥүл тустууга ССРС спордун маастара, Саха сирин уонна Россия үтүөлээх тренерэ, Д.П. Коркин аатынан Судаарыстыбаннай бириэмийэ лауреата, Уус Алдан улууһун уонна Найахы нэһилиэгин бочуоттаах олохтооҕо Степан Петрович Сивцев үбүлүөйдээх 65 сааһын үөрүүлээхтик бэлиэтээһин буолла.

Онон найахылар сэргэхсийдилэр. Өтөрүнэн буолбатах улахан күрэхтэһиини көрдүлэр. Үөрүүлээх тэрээһиҥҥэ кэлбит бочуоттаах ыалдьыттары, спорт, тустуу бастыҥ дьонун кытта билистилэр.

Чемпионат үөрүүлээх аһыллыытыгар үбүлүөйдээх Степан Петровиһы эҕэрдэлээтилэр: Найахы нэһилиэгин баһылыга Петр Слепцов, Саха Республикатын физическэй култуураҕа уонна спорка министрэ Леонид Спиридонов, Ил Түмэн депутата Геннадий Васильев, Уус Алдан улууһун баһылыгын бастакы солбуйааччы Семен Бурнашев, «Ленские столбы» национальнай паарка дириэктэрин солбуйааччы Яков Заровняев, Өймөкөөн баһылыгын бастакы солбуйааччы Алексей Федотов, Уус Алдан спорка общественноһа, тустууга уһуйбут уолаттара уонна бииргэ төрөөбүттэрэ.

Кинилэр, Уус Алдан улууһа билигин даҕаны, тиһигин быспакка, саха омукка улахан биһирэбили ылар – көҥүл тустууга улахан дьоҥҥо биирдиилээн уонна хамаанданан бастыыр иһин улуус чемпионатын тэрийэн ыыта туралларын кэрэхсээтилэр; найахылар маннык күрэхтэһиини үрдүк таһымнаахтык тэрийбиттэригэр махтаннылар; уонна саамай сүрүнэ бу күн буруйдааҕа – Степан Петровиһы ис сүрэхтэриттэн эҕэрдэлээтилэр, кытаанах доруобуйаны, ситиһиилээх үлэни баҕаран туран бэйэлэрин бэлэхтэрин, наҕараадаларын туттардылар.

Ол курдук, Леонид Спиридонов – Найахы кыһатыгар тустуу көбүөрүн бэлэх туттарбытын, олохтоох дьон уруйдуу көрүстэ.

Үөрүүлээх тэрээһин иккис түһүмэҕэ нэһилиэк кулуубугар өргө диэри ньиргийдэ. Биллэн турар, бэлиэ күҥҥэ – наһаа нарын ырыалаах найахылар ырыалара элбэхтэ ылланан, көрөөччүлэр дохсун ытыстарын тыаһынан доҕуһуолланна.

Петр ПАВЛОВ.

Ааптар хаартыскалара.