Николай Данилов: «2026 сылга сыал-сорук улахан»

// Экспресс-интервьюлар

Спорт олимпийскай көрүҥнэригэр Саха сирин 2025 сылга бастыҥ спортсменынан ааттаммыт тустуук Лев Павловы дьарыктааччы, республика үтүөлээх тренерэ Николай Романович Данилов:

-Николай Романович, эҕэрдэ! Бу наҕарааданы ыла туран эйиэхэ туох санаа киирбитин билиэххэ сөп дуо?

-Бастатан туран махтал! Ааһан эрэр сыл биһиэхэ эриэккэс сыл буолан биэрдэ. Ярыгин турнирыгар иккис буолан, Европа күрэхтэһиитигэр кыайан, сылы үчүгэйдик саҕалаабыппыт. Оттон эппиэтинэстээх күрэхтэһиибитигэр – Россия чемпионатыгар хотторон кэбиспиппит. Ол хотторуу биһиэхэ үчүгэй үөрэх, уруок буолла дии саныыбын.

Ол кэнниттэн эдэрдэргэ Россия күрэхтэһиитигэр уонна ини-бии Хадарцевтар турнирдарыгар үһүс буоллубут. Оттон Россия Кубогар көрсүбүт тустууларыгар барытыгар кыайыыны ситиһэн, биирдиилээн түмүккэ бастакы миэстэни ыллыбыт. Онон хотторуута суох – кыайыы суох диэн этэллэрэ сөптөөх эбит. Туох барыта үчүгэйгэ буолан эрэр диэн, билигин эрэх-турах санаалаахпыт. Инникитин өссө күүскэ хардыылаан үөһэ үрдүкү үктэллэргэ тахсыбыт киһи диэн соруктаахпыт.

Үүнэр сылга бастакы тустуубут – Ярыгин турнира буолуоҕа. Онно анаан анал үөрэтэр-эрчийэр түмсүү номнуо саҕаламмыта. Лев туруга этэҥҥэ. Онон үчүгэй тустууну кэтэһэбит. Ааһан эрэр сыллааҕар арыый атын, сэргэх тустуу буолуоҕа.

Петр ПАВЛОВ.