Мукучуга Серафим Иванов кэриэһигэр хапсаҕай тэрилиннэ

Соторутааҕыта, Саха сиригэр хапсаҕай биир киинигэр – Мукучуга көҥүл тустууга ССРС спордун маастарыгар хандьытаат, Саха сирин сүүмэрдэммит хамаандатын чилиэнэ, бэйэтин кэмигэр кэскиллээх тустуук, Саха Өрөспүүбүлүкэтин спордун бэтэрээнэ Серафим Иванович Иванов 80 сааһын сырдык кэриэһигэр аналлаах оҕолорго хапсаҕайга өрөспүүбүлүкэтээҕи турнир тэрилиннэ.

Кэбээйи, Хаҥалас, Мэҥэ Хаҥалас, Ньурба, Үөһээ Бүлүү, Бүлүү улуустарыттан, Дьокуускай куораттан 170 эдэр тустуук көбүөргэ тахсан бастыҥ аатын былдьастылар.

Кылбар хамсаныылаах хапсыһыыларга чемпион үрдүк аатын Артем Попов, Егор Ефремов, Тимофей Ноев, Артем Винокуров, Айхан Ноговицын, Степан Иннокентьев, Платон Саввинов, Леонид Иванов, Марк Антонов, Кэскил Федоров, Ратмир Прокопьев ыллылар.

Муҥутуур кыайыылаах аатын Мукучуттан Марк Куличкин ылла.

13 чемпион 15 тыһ. солк. бирииһи тардыбыттарыттан, дьол Артем Винокуровка тосхойдо.

Күрэхтэһии уратытынан, 4 бастакы миэстэлэри ылбыттарга сыаналаах бириистэр туттарылыннылар.

Турнир тэрийээччилэрэ Серафим Иванович Иванов кэргэнигэр Анастасия Петровнаҕа, оҕолоругар, сиэннэригэр, бириистэри туруорбут тэрилтэлэргэ, биирдиилээн дьоҥҥо махталларын биллэрдилэр.

Күрэхтэһии кэмигэр Кэбээйигэ 2026 сылга тэриллиэхтээх Олоҥхо ыһыаҕар анаан эр дьон оһоухайа дьиэрэйдэ.

Соторутааҕыта Серафим Иванович Иванов сиэнэ, эһэтин туйаҕын хатарбыт Дмитрий Иванов, Алексей Никифоров бирииһигэр хапсаҕайга эдэрдэргэ өрөспүүбүлүкэ чемпионатыгар 57 киилэҕэ үрүҥ көмүс мэтээли ылары ситистэ. Утум салҕанар.

Дьулурҕан.