Кай кыайыа дуу, Алексей дуу? Кими талаҕын?

Ахсынньы 6 күнүгэр «Өрөгөй» Спорка бэлэмнэнии киинигэр «Вызов Севера» диэн профессиональнай боксаҕа киирсиилэр буолуохтара.

Онно бэлэмнэнэн бүгүн – ахсынньы 3 күнүгэр киин куорат «Панчер» кулуубугар кыттааччылар бэйэлэрин дьарыктарын ньымаларыттан суруналыыстарга сэгэтэн көрдөрдүлэр.

Ол курдук, Саха сирин биир бастыҥ боксёра, Россия чемпионатын икки төгүллээх призёра Михаил Прокопьев медиа-тренировкатын; саха национальнай спордун чулуулара, Дыгын оонньуутун муҥутуур кыайыылааҕа Алексей Уваровскай итиэннэ кынаттаах кылыыһыт Кай Адамов рингэҕэ тахсан «Вызов Севера» күрэхтэһиигэ бэрт былдьаһаары ох курдук оҥосто, кустук курдук куоһана сылдьар түгэннэрин; Таиланд курдук куйаас дойдуттан тыйыс Хотугу дойду ыҥырыытын ылынан кэлбит Физит Паочантуэк, Азия бастыҥын аатын-суолун ылаары саха уола Михаил Варламовы кытта күөн көрсүөн иннинээҕи бэлэмнэниитин видео-кэрчиктэрин “Дьулурҕан” хаһыат телеграмҥа каналыгар t.me/dzulurgan көрүөххүтүн, билсиэххитин сөп.

Онон дьэ, бу субуотаҕа сытыы күрэстэһии күүтүллэр.

Гаврил СТРУЧКОВ.

Ааптар хаартыскалара.