Эдэр, кэскиллээх саахыматчыт – Денис Назаров

Ааспыт нэдиэлэҕэ, ахсынньы 8-14 күннэригэр Дьокуускай куоракка 83-с төгүлүн саахымакка өрөспүүбүлүкэ чөмпүйэнээтэ ыытылынна. Ол курдук, бэрт сытыы, тыҥааһыннаах киирсии түмүгэр, төрдүс үктэлгэ тахсыбыт Мэҥэ Хаҥалас улууһуттан сылдьар Денис Назаровы кытта сэһэргэстим.

Санатан аһарар эбит буоллахпына, Денис Назаров – саахымакка спорт маастарыгар хандьыдаат, улахан дьоҥҥо өрөспүүбүлүкэ икки төгүллээх чөмпүйүөнэ, призёра, оҕолорго Уһук Илиҥҥи федеральнай уокурук хас да төгүл хаһаайына. Майа спорт оскуолатыгар Анастасия Иннокентьевна Харитонова, Ульяна Спиридоновна Шишигина, Гаврил Ильич Колосов салалталарынан дьарыктанан, күрэхтэһиилэргэ кыттан саҕалаабыта.

Оттон кэлин, Владимир Мэндэевич Таппыровка эмиэ дьарыктаммыта. Билигин Денис Чурапчытааҕы култуура уонна спорт үнүстүүтүгэр үһүс кууруска үөрэнэр. Үрдүкү лигаҕа быйыл бэһис төгүлүн кыттыыны ылла уонна өрөспүүбүлүкэ биир тумус туттар күүстээх саахыматчыта буоларын өссө төгүл көрдөрдө дии саныыбын.

— Денис, бэйэҥ тускунан кыратык ааҕааччыларга билиһиннэр эрэ.

— Үтүө күнүнэн! Мин саахыматы түөрт сааспыттан оонньоон саҕалаабытым, билигин 20 саастаахпын, ол аата, 16 сыл курдук саахымат көрүҥүнэн дьарыктанабын.

— Хас сааскар успуорт маастарыгар хандьыдаат буолбуккунуй?

— Бастакы КМС-пын 12 сааспар Уһук Илиҥҥи федеральнай уокурукка оҕолорго кыайаммын толорбутум, онтон ол КМС сроктаах, ол иһин, иккис КМС-пын 2020 сыллаахха 14 саастаахпар эмиэ Уһук Илиҥҥи федеральнай уокурукка бастааммын толорбутум.

— Өрөспүүбүлүкэ чөмпүйэнээтэ тус бэйэҕэр хайдах ааста?

— Чөмпүйэнээт олох ыарахан партиялардаах ааста тус бэйэбэр, бүтэһик партияҕа диэри ким бастыыра биллибэт этэ.

-Эн улахан дьоҥҥо өрөспүүбүлүкэ икки төгүллээх чөмпүйүөнэҕин, дьэ, ол хас сыллаахха, хас сааскар кыайа-хото сылдьыбыккыный?

— Аан бастаан 2019 сыллаахха 14 саастаахпар бастаабытым, 2020 сыллаахха пандемиянан күрэхтэһии сибээстээн ыытыллыбатаҕа, онтон 2021 сыллаахха 16 саастаахпар чөмпүйүөн үрдүк аатын ылбытым, салгыы 2022 с. иккис миэстэ буолбутум, онно бастыырбар очукуо аҥара тиийбэтэҕэ, кэлиҥҥи кыттыбыт икки сылбар төрдүс миэстэ буоллум.

— Бу чөмпүйэнээккэ тус бэйэҕэр, саамай тыҥааһыннаахтык ааспыт ханнык партияны ордук бэлиэтиэҥ этэй?

— Саамай ыарахан партиям 10-с турга буолбута, Жирков Влад утары, маҥанынан «Котовскай вариаҥҥа» баран, уустук позицияны ылынан, тэҥнэспиппит. Бүтэһигэр диэри биллибэт этэ ким кыайара, ким хоттороро.

-Оттон ханнык партияттан, оонньууттан астыныыны уонна дуоһуйууну ыллыҥ?

— Ахсыс турга Постников Алик утары, бу саамай быһаарыылаах киирсиибит этэ.

— Уопсайынан, эн ханнык саахыматчыттартан холобур ылаҕыный, ким оонньуутун астына көрөҕүнүй?

— Холобур ылабын мин, Постников Аликтан буолуо, кини элбэх күрэхтэһиилэргэ кыттар, форматыгар сылдьар, эмоционально үчүгэйдик туттунар, психологически эҥин барытын эмиэ үчүгэйдик аһардар.

— Билигин салгыы өссө ханнык күрэхтэһиилэргэ кыттар былааннааххыный?

— Муус устар ыйга, сылын ахсын ыытыллар Ил Дархан Кубогар кыттыбыт киһи диэн баҕа санаалаахпын.

— Саҥа саахыматынан дьарыктанан эрэр оҕолорго тугу сүбэлиэҥ этэй?

— Биир саамай сүрүнэ, выдержка наада, кыайан туттунар буолуоххун наада, оччоҕуна барытын ситиһиэххин сөп.

— Саахыматы сэҥээрэн көрөөччүлэргэ баҕа санаан.

— Кэлэн ыалдьыҥ, көрүҥ! Күрэхтэһиилэр куруутун үчүгэй баҕайытык этэҥҥэ, үрдүк таһымнаахтык ааһаллар.

— Денис, эйиэхэ инникитигэр өссө үрдүк ситиһиилэри уонна дабайыылары баҕарабын!

— Махтал!

Милена АНДРЕЕВА, М.К. Аммосов аатынан Хотугулуу-Илиҥҥи федеральнай университет 3-с куурсун студентката.