Дыгын оонньууларыгар бастакы сүүмэрдээһин түмүктэннэ

Ааспыт өрөбүллэргэ, «Дохсун» успуорт киинигэр күүтүүлээх, долгутуулаах маҥнайгы Дыгын оонньууларыгар сүүмэрдээһин этэҥҥэ түмүктэннэ. Ол курдук, боотурдар 58 буолан күрэхтэһиини саҕалаабыттара.

Көрүҥнэринэн ким миэстэлэспитин этэр эбит буоллахпына маннык.

Үс төгүл үс:

1 миэстэ — Яков Дмитриев (Кэбээйи) — 35,17

2 миэстэ — Владислав Попов (Нам) — 34,23

3 миэстэ — Валентин Афанасьев (Ньурба) — 33,53

Тутум эргиир:

1 миэстэ – Алексей Соколов (Сунтаар) – 67 эргиир

2 миэстэ – Айастаан Колесов (Э-Бытантай) – 66 эргиир

3 миэстэ – Владислав Кузьмин (Чурапчы) – 65 эргиир

Мас тардыһыы:

1 миэстэ – Семён Ануфриев (Уус Алдан)

2 миэстэ – Тимофей Большаков (Сунтаар)

3 миэстэ – Ариан Мярин (Томпо)

Ох саа:

1 миэстэ – Николай Матаннанов (Таатта)

2 миэстэ – Айсен Семёнов (Өлөөн)

3 миэстэ – Артём Оконешников (Орто Халыма)

Сүүрүү:

1 миэстэ – Руслан Слепцов (Мэҥэ Хаҥалас) — 53,27

2 миэстэ – Михаил Руфов (Үөһээ Бүлүү) — 53,32

3 миэстэ – Антон Уваров (Бүлүү) — 53,81

Хапсаҕай:

1 миэстэ – Артём Дьяконов (Кэбээйи)

2 миэстэ – Айсен Семёнов (Өлөөн)

3 миэстэ – Иван Степанов (Дьокуускай)

Таас көтөҕүү:

1 миэстэ – Алексей Ефимов (Муома)

2 миэстэ – Артём Дьяконов (Кэбээйи)

3 миэстэ – Александр Пшенников (Өлүөхүмэ).

Бу курдук биирдиилээн көрүҥнэринэн кыайыылаахтар быһаарылыннылар, оттон уопсай сэттэ көрүҥ түмүгүнэн, кэлэр 2026 сылга Туймаадабыт киэҥ нэлэмэн хочотугар Дыгын оонньууларын түһүлгэтигэр кыттар иһин быраабы ыллылар: Николай Матаннанов, Яков Дмитриев уонна Артём Дьяконов. Эһиил сайын Дыгыҥҥа көрсүөхпүт!

Уолаттар бары бу икки күн устата сытыы, тыҥааһыннаах үчүгэй киирсиилэри көрдөрдүлэр. Ону тэҥэ, эдэр спортсменнар убайдары кытта бэртээхэй утарсыылары оҥордулар. Олортон бэлиэтээн этиэм этэ, 2006 с төрүөх, Мэҥэ Хаҥалас бөҕөһүн Руслан Слепцову, кини сүүрүүгэ бастаан, атын да көрүҥнэргэ бэйэтин куһаҕана суохтук көрдөрөн, уопсай түмүккэ бочуоттаах бэһис миэстэҕэ таҕыста, элбэх биллэр-көстөр спортсменнары бэйэтин кэннигэр хааллартаата, бу эмиэ элбэҕи этэр. Сотору кэминэн Дыгын оонньууларыгар көрүөхпүт диэн бигэ эрэллээхпин, ол барыта бэйэтин илиитигэр. Салгыы этэн аһарыам этэ Айаал Бурцевы, күрэхтэһии түмүгүнэн, элбэх дьон хараҕар хатаммыт буолуохтаах, хапсаҕайга бэртээхэй бырахсыылары, хамсаныылары көрдөрбүтэ. Онон, этэҥҥэ буоллаҕына, бу уол аатын биһиги өссө да истиэхпит турдаҕа.

Биллэн туран, саха дэгит көрүҥнэрэ кыттааччылартан хайдахтаах курдук сыраны-сылбаны, үлэни-хамнаһы, бириэмэни, бэйэҕин ууран, элбэҕи быраҕан туран дьаныардаах, тулуурдаах дьарыгы ирдиирин, төһөлөөх элбэх көлөһүнү тоҕоллорун өйдүүбүт, билэ-көрө сылдьабыт. Дэлэҕэ, мээнэ киһи ылсыбат успуордун көрүҥэ буоллаҕа. Дьиссипилиинэлээх, чөл олоҕу тутуһар, төбөтүн, психологияны кытта ыкса үлэлэһэр, кинигэ ааҕар, бэйэтин куруутун сайыннара, ис туругун билэ-көрө, үөрэтэ, сыыһаларын өйдөөн көннөрөр киһиэхэ кыайыы өрөгөйө хаһан эмэ син биир тосхойор, тигинээн кэлэр диэн өйдөбүллээхпин.

Түмүктээн, дэгэтэн эттэхпинэ, Дыгын оонньууларыгар биир хостоох дьиэ уонна 3 мөлүйүөн солк. уу харчынан турбут бириис бөҕөстөрү өссө үрдүк кыайыыларга кынаттыыра чуолкай. Онон, спортсмен уолаттарга күүстээх санааны, таһаарыылаах дьарыгы, тэтимнэрин ыһыктыбакка, ыарахантан чаҕыйбакка иннин хоту баран иһэллэригэр! Бэйэ-бэйэҕэ убаастабыллаах, харыстабыллаах сыһыаны өрө туталларыгар. Аныгыскы сүүмэрдээһиннэргэ – Уус Алдаҥҥа, Чурапчыга көрсүөххэ диэри!

Милена АНДРЕЕВА, М.К. Аммосов аатынан Хотугулуу-Илиҥҥи федеральнай университет 3-с куурсун студентката.