Дуобатчыт Тимур Бурнашев ситиһиилэрэ

Дуобатчыт оҕолорбут бэйэлэрин ситиһиилэринэн биһигини өрүү үөрдэллэр. Ол курдук, Дьокуускай куорат национальнай гимназиятын алтыс кылааһын үөрэнээччитэ Тимур Бурнашев соторутааҕыта Турцияҕа ыытыллыбыт аан дойду оҕолорго күрэхтэһиитигэр 64 уонна 100 харахтаах дуобаттарга иккиэннэригэр кыттан – Россия, Саха сирин хамаандаларыгар барыта алта мэтээли аҕалла.  

Тимур дуобатынан алта сааһыттан үлүһүйэн дьарыктанар. Ааһан эрэр сылга кини 14 саастаах уолаттарга (2012-2014 сс. төрөөбүттэргэ) Саха Республикатын күрэхтэһиитигэр нуучча дуобатыгар – классическай, чаҕылханныы уонна түргэн оонньууларга үһүөннэригэр бастакы миэстэни ылан, сүүмэрдэммит хамаанда састаабыгар киирбитэ. Өссө бу күрэхтэһиигэ Тимур 100 харахтаахха икки көрүҥҥэ инники тахсыбыта.

Сайын, «Спортивные якутяне» диэн үөрэнээччилэр республикатааҕы спартакиадаларыгар Дьокуускай хамаандатын састаабыгар оонньоон, түмүккэ иккис буолбуттара. Оттон Ярославль куоракка 64-тээххэ улахаттары кытта оонньоон, икки программаҕа ситиһиилээхтик кыттан, Саха сирин хамаандата бастакы миэстэҕэ тахсарыгар бэйэтин кылаатын киллэрбитэ. Самараҕа буолбут Россия күрэхтэһиитигэр эриэ-дэхси көрдөрүүнү ситиһэн, Россия сүүмэрдэммит хамаандатын састаабыгар киирбитэ. Оттон Москва уобалаһын Одинцова куоратыгар буолбут Россия 100 харахтаах дуобакка күрэхтэһиитигэр үс программаҕа үһүөннэригэр бастаан, муҥутуур кыайыылаах буолбута. Өссө, Россия үтүөлээх тренерэ Н.Н. Кычкин кэриэһигэр 100 харахтаах дуобакка Бүтүн Россиятааҕы турнирга бэйэтин саастыылаахтарыгар тэҥнээҕин булбатаҕа.

Муус устарга Турцияҕа ыытыллыбыт Европа түргэн программаларга күрэхтэһиитигэр икки кыһыл көмүс, биир боруонса мэтээли ылары ситиспитэ. Ити курдук, Тимур 2025 сылга ситиһиилэрин салгыы билиһиннэрдэххэ, Ил Дархан кубогар нуучча дуобатыгар бастакы миэстэни ылбыта.

Тимур Дьокуускай куорат 5 №-дээх спортивнай оскуолатыгар бастакы кылаастан дуобатынан үлүһүйэн дьарыктанар. Бастакы тренерэ – Матрена Петровна Кычкина, билигин тренер Иван Олегович Павлов салалтатынан үһүс сылын эрчиллэр. Манна сыһыары тутан эттэххэ, Тимур Бурнашев ыам ыйыгар киин куорат болуоссатыгар ыытыллыбыт гроссмейстердары кытта сеанска кыттан, кыайыыны ситиспитэ.

Онон уолаттарга, эр дьоҥҥо төһө да састаап олус күүстээҕин үрдүнэн, кини ситиһиилэрэ чаҕылхайдар. Бу – Тимур күн аайы баҕаран туран дьарыктаныытын уонна тренер үлэтин түмүгэ диэххэ сөп. Балаҕан ыйыгар Россия улахан дьоҥҥо чемпионатыгар бэйэтин күүһүн холонон, тус бэйэтин маастар нуорматын толоруутугар рейтинин үрдэппитэ.

Тимур – талааннаах дуобатчыт, кэскилэ – иннигэр. Баҕарабыт, кини баҕа санаатын толорон, спорт бу көрүҥэр өссө үрдүк көрдөрүүлэри ситиһэн, улахан таһымнаах дуобатчыт буоларыгар.

«Дьулурҕан».