«Дьулурҕан» хаһыат – инники эрэлбит!

Саха сиригэр эти-хааны эрчимирдэр, чөл олоҕу сайыннарар хамсааһыннар өссө 1920 сыллартан саҕаламмыттарын билэбит. Сүрүн тэрээһининэн ордук физкултуура уонна спорт сайдыыта, элбэх араҥаны хабар сыаллаах үлэтин чэрчитинэн, 1923 сыллаахха Саха сирин физическэй култуура сэбиэтэ тэриллибитэ. Ити маассабай хамсааһын үгүс сэҥээриини тардыбыта. Сылтан-сыл, көлүөнэттэн-көлүөнэҕэ бэриллэн, кэнники сылларга устуоруйабыт кэрэһитэ буолбута.

Ол эрэн, билигин бүтүн Сахабыт сиригэр спорду өрө тутар уонна спорт эйгэтин өрүү сырдатар «Дьулурҕан» эрэ сыһыарыыта соҕотох үлэлиирэ сонньутар.

Билигин сүрүн спорт сонуннарын мин тус бэйэм бу сыһыарыыттан ааҕан билэбин.

Редактор Петр Семенович Павлов хаһыакка эрэ буолбакка, аныгы үйэ сырдатыы киэҥ эйгэтигэр спорт бары көрүҥнэрин, ааспыт үлэлэр чахчыларын уонна спортсменнар ситиһиилэрин арылыччы тиһигин быспакка сырдатарын хайгыыбыт уонна өйүүбүт. Кырдьык, Петр Семенович биир санаалаах ааптардар өйөбүллэринэн, Саха сирин муннуктарын барытын хабан, дьүккүөрдээх үлэтин, киһи эрэ сөҕөр уонна махтанар.

Быйылгы сылга, Саха бэчээтин үбүлүөйдээх сылыгар уонна уу сахалыы тахсар соҕотох хаһыаппыт сыһыарыыта элбэх матырыйаалларынан ааҕааччы сэҥээриитин ылбыта саарбаҕа суох.

Ол да буоллар, күндү «Дьулурҕаммыт» олус суолталааҕын уонна ааҕааччы болҕомтото олус наадалааҕын ааҕабын. Биир бэйэм, бу «Забота-Арчы» хаһыат анал таһаарыытын көтүппэккэ ааҕабын. Хаһыат балаһатыгар санаабын уонна улууһум спордун ситиһиилэрин ыытарым быһыытынан, биир үөлэннээхтэрбэр, бу хаһыат уонна сыһыарыы өрүү тахса туралларыгар баҕарабын!

Анатолий СОФРОНОВ – Онтуон, РФ Суруналыыстарын сойууһун чилиэнэ, спорт бэтэрээнэ, СР физическэй култуураҕа уонна спорка туйгуна, СахаВА бочуоттаах маастара, хас да кинигэ ааптара. Нам улууһа.