Дьиэ кэргэн, тренер сөптөөх дьайыытын ситиһиитэ

// Эдэр корреспонденнар суруйаллар 

Ааспыт сайын ытык Тааттаҕа саха төрүт көрүҥнэригэр XXII Маанчаары оонньуулара тэрээһиннээхтик, үрдүк таһымҥа ааспыта. Төрүт көрүҥнэр истэригэр бэргэнник ытыыга Саха сирин спордун маастарын толорбут Никита Свешников туһунан хаһыат ааҕааччыларыгар сырдатыахпын баҕарабын.

Сахалар удьуордаан бэргэн ытааччы буоларбытын, бу улахан спорт түһүлгэтигэр Таатта ыччата көрдөрөн, биир дойдулаахтарын үөрдүөн үөртэ. Никита күрэскэ күүстээх утарсыылары көрсөн, бу үрдүк ааты ылбыта саарбаҕа суох.

Никита 2008 сыллаахха Уус Алдан улууһугар күн сирин көрбүтэ, Таатта улууһун Тыараһа нэһилиэгин орто оскуолатыгар 11-с кылааска үөрэнэр. Бииргэ төрөөбүт убайа Станислав  эмиэ булдьанан ытыынан дьарыктанар, маастарга кандидат, оҕолорго өрөспүүбүлүкэ чөмпүйүөнэ, призера.

Никиталаах эбэлэрэ Екатерина Николаевна эмиэ булдьанан ытыынан дьарыктанар, бэтэрээннэргэ Саха сирин спордун маастара. Оттон  ийэлээх-аҕата иккиэн учуутал идэлээхтэр. Аҕалара Дмитрий Михайлович физкултуура учуутала буолан, спорт араас көрүҥнэринэн дьарыктаммыт, дьарыктанар. Ол иһигэр буулдьанан ытыынан дьарыктанан, үөрэтэр оҕолорун дьарыктаабыт. Ийэлэрэ Светлана Семеновна спорду өрө тутаааччы, көҕүлээччи буолар.

Маннык ийэттэн-аҕаттан, эбэттэн саҕалаан, спорка хомуллуулаах, спорка болҕомтону уурар дьиэ кэргэҥҥэ, спортсмен ситиһиилээх буолара чахчы. Бу уустук спорт көрүҥэ уол оҕо эр киһи буола улаатарыгар, сайдарыгар олук буолар. Буулдьанан ытыы спорда кэккэ уустуктардаах, буулдьа тыал хайа диэки хайысхалааҕыттан таба түһэрэ тутулутаах. Маныаха спортсмен болҕомтолоох, тулуурдаах, хамсаппакка тутар кытаанах илиилээх, тирэхтээх атахтаахтаах, кыраҕы харахтаах, түргэн токуйдаах буолара ирдэнэр. Бу спорт ирдэбилин спортсмен холкутук туораатаҕына биирдэ ситиһии кэлэр. Манна дьаныардаах дьарык, кыайыыга тулуур, эрэл, халбаҥнаабат санаа эбилиннэҕинэ, кыайыы өрөгөйүн ситиһиэххэ сөп.

Үөрэнээччи ситиһиитэ – тренер ситиһиитэ. Үөрэнээччи үөрүүтүн-хомолтотун бастакынан үллэстээччи, кини тренерэ буолар. Никита буулдьанан ытыынан 7-с кылаастан дьарыктаммыт. Тренерэ Гаврил Сергеевич Огонеров сатабыллаах, сөптөөх дьарыгын сыратыттан уонна Никита ситимнээх, дьаныардаах үлэтинэн, бу кыайыы ситиһилиннэ. Бу курдук дьиэ кэргэн, тренер сөптөөх дьайыылара, кыайыыттан кыайыыны аҕалар. Инникитин Никитаҕа өссө үрдүк ситиһиилэри баҕарабын.

Алексей САВВИН, Тааттатааҕы А.Е. Мординов аатынан лиссиэй 9-с кылааһын үөрэнээччитэ.