Чурапчыга, Вячеслав Карповка аналлаах тэрээһиннэр

Ахсынньы 8-12 күннэригэр Чурапчыга Карпов Вячеслав Павлович аатынан ДЮСШ-ҕа, Вячеслав Павлович Сойууска оҕолорго чемпионнаабыта уонна Чурапчы орто оскуолатын бүтэрбитэ 60 сылларын бэлиэтиир тэрээһиннэр ыытылыннылар.

Ол курдук, кылаас чаастара, ДЮСШ-ҕа В.П. Карпов стендэтэ аһыллыыта уонна 2014-2015, 2016-2017 сылларга төрөөбүт кыра бөҕөстөргө тустууга турнир ыытылыннылар. В.П Карпов дьиэ кэргэнэ стендэҕэ анаан Сойууска чемпионнаабыт хаартыскатын бэлэх ууннулар. Д.П. Коркин аатынан музей дириэктэрэ Егор Васильевич Пудов уонна Анна Петровна  Спиридонова музей экспонаттарыттан эмиэ бэлэхтээтилэр.

Спортивнай интэринээт-оскуолабытын аатырдыбыт улуу тренербит Коркин Д.П. дьарыктаабыт бөҕөстөрө Олимп чыпчаалыгар тахсыбыттарын бары билэбит уонна киэн туттабыт. Спортивнай томторбут олус дириҥ, баай историялаах, элбэх эдэр ыччат кэлэн мустар, үөрэнэр, дьарыктанар, үлэлиир, сайдар сирэ буолар. Күн бүгүҥҥэ диэри интэринээт-оскуолаттан элбэх оҕо кынаттанан, ситиһиилэнэн, сүрэҕэр эрэл кыымын уматан олох киэҥ аартыгар үктэнэллэр.

Оскуолабытыгар 2005 сылтан дириэктэр Н.Н. Гуляев идеятынан уонна дириэктэри иитэр үлэҕэ солбуйар Т.Н. Решетникова салалтатынан СахаСпАрт диэн кылаастар икки ардыларыгар күрэхтэһии проект тэтимнээхтик үлэлиир. Кылаастар бары этээрээттээхпит, спорт эйгэтигэр ааттаах-суоллаах, тумус туттар дьоммут ааттарын сүгэбит. Ол курдук, олимпийскэй чемпионнарбыт, призердарбыт Павел Пинигин, Роман Дмитриев, Александр Иванов, Сахабыт сирин спорта сайдыытыгар сүдү кылаатын киллэрбит, спортивнай томторбут олохтооҕо, тумус туттар ытыктыыр киһибит Михаил Дмитриевич Гуляев; көҥүл тустууга үрдүк ситиһиилэрдээх бөҕөстөрбүт, Коркин иитиллээччилэрэ – Василий Гоголев, Николай Захаров — Сахаачча, Роман Неустроев, Алексей Диодоров, Илларион Федосеев, Семен Макаров, Иннокентий Зырянов, Михаил Скрябин, Будимир Яковлев, Егор Пудов, Петр Калачев, быраттыы Морфуновтар уонна да атыттар.

Д.П. Коркин аатынан Чурапчытааҕы спортивнай олимпийскэй эрэллэри бэлэмниир орто оскуола 11 а кылаас этэрээтэ Вячеслав Павлович Карпов аатын сүгэллэр. Карпов стендэҕэ этэрээт үлэтин сырдатар быыстапка баннер туруордулар, карповчан-уолаттар турнир аһыллыытыгар доргуччу хоһоон ааҕан көрөөччүлэри сөхтөрдүлэр.

Оттон С.А. Новгородов аатынан орто оскуола быйылгы выпускниктарыгар кылаас чааһа ыыттылар. Вячеслав Павлович олус интеллигентнай, элбэҕи ааҕарын сөбүлүүр, араас дойдуга сылдьыбыт киэҥ көрүүлээх, күүстээх санаалаах киһи буолар диэн билэбит. Онон сирдэтэн этэрээт араас хайысханан үлэлиирин сырдаттылар.

В.П. Карпов туһунан викторина уонна «Наша сила в руках” этэрээт проегын чэрчитинэн уолаттарга күрэхтэһии ыыттылар. Кыайыылаахтар дипломунан наҕараадаланнылар. Дуобакка Россия маастара, аан дойду оҕолорго чемпиона Саша Рожина 28 киһиэхэ дуобакка сеанс оонньотто. Кыра бөҕөстөргө анаан В.П. Карпов этэрээтэ анал бириис туруордулар. 11 а кылаас оҕолоро маннык, Карпов аатынан этэрээт кинилэри түмэр, сайыннарар дии саныыбыт. Вячеслав Павлович Карповка аналлаах тэрээһиннэр үрдүк таһымҥа ыытыллыбыттарыттан бары да олус астынныбыт.

Зинаида ШЕСТАКОВА, В.П. Карпов аатынан этэрээт 11 “а” кылаас салайааччыта.

Чурапчы.