Чемпионтан экспресс-интервью

Бүгүн, саахымакка Саха сирин чемпионата түмүктэннэ. Кыайыылааҕынан Альберт Постников (Таатта) таҕыста. Таатталарга саахымакка маннык үрдүк аат, кыайыы үйэ чиэппэрэ буолан баран тигистэ. Бу иннинэ 2000 сыллаахха Евгений Охотин Саха сирин чемпионатыгар бастаан турардаах.

Чемпион Альберт Постниковтан аҕыйах ыйытыыга хоруйдууругар көрдөстүм.

-Эн түөрт төгүл республика чемпионатыгар кыттан бу саҥа кыайдын, бу чемпионат атын турнирдартан туох уратылааҕый, анал бэлэмнэммитиҥ дуо?

-Анал бэлэмнэнии суоҕа. Бу иннинэ Россия Кубогар үчүгэйдик кыттыбытым, онон формабар киирэрбэр көмөлөстө. Урукку өттүгэр чемпионаттарга маннык бэлэмнээх кэлбэтэҕим таайар этэ, оонньуубар.

-Утарсааччыларгын кытта оонньуургар төһө анаан бэлэмнэнэҕиний?

-Оннук анал бэлэмнэммэппин, арай бүтэһик турга Амолуун оонньуурбар, 6 чаас бэлэмнэммитим.

-Саамай уустук, эппиэттээх партияҕынан кими кытта оонньообуккун бэлиэтиигин?

-Денис Назаровы кытта ордук суолталаах уонна хаачыстыба өттүнэн үрдүк, Николай Капитоновтыын партиям эмиэ сыаналаах этэ.

-Саахымакка бастаан оонньуурга ким үөрэппитэй?

-Эһэм Иван сайын Тааттаҕа, Харбалаахха кэлэ сырыттахпына үөрэппитэ. Бастакы улахан кыайыым Чычымахха «Кулунчук» турнирга кыайаммын, харчынан бириис ылбытым, салгыы дьарыктаҥарбар мотивация буолбута.

-Инники дьарыктанаргар эйигин саахымат оонньуута тугунан мотивациялыырый?

-Бу сөбүлүүр дьарыгым уонна маастар, эбэтэр международнай маастар буолар баҕа умсугутар.

-Тренерин кимий, бу турнирга анаан дьарыктанныҥ дуо?

-Бу турнирга бэйэм, онтон уопсайынан гроссмейстер Антон Шомоевы кытта дьарыктаммытым.

Сэһэргэстэ Степан СОРОВ.