Анатолий Константинов кэриэһигэр тустууга ыҥырабыт!

Уус Алдан улууһун Суотту сэлиэнньэтигэр ахсынньы 26 күнүгэр көҥүл тустууга Саха сирин 7, Манчаары спартакиадатын хапсаҕайга 3, бэтэрээн-маастардарга аан дойду чемпионатын 2 төгүллээх чемпиона, Саха АССР, РСФСР, ССРС спордун маастара, Саха Республикатын үтүөлээх тренерэ Анатолий Николаевич Константинов кэриэһигэр көҥүл тустууга республикатааҕы 13-с турнир ыытыллар.

Күрэхтэһии Анатолий Константинов туста сылдьыбыт 62, 68 уонна 74 кг ыйааһыннарыгар тэриллэр. Ону тэҥэ хапсаҕайга муҥутуур кыайыылааҕы быһаарар түһүлгэ буолар. Хапсыһыылар түмүктэринэн ыйааһыннарыгар бастаабыттар – 30, иккистээбиттэр – 20, үһүс буолбуттар – 10 тыһ. солк. харчынан наҕараадаланыахтара. Хапсаҕай муҥутуур кыайыылааҕа булт саатын ылар кыахтаныаҕа.

Күрэхтэһии – Суотту нэһилиэгин, Уус Алдан улууһун спорка управлениетын уонна Константиновтар дьиэ кэргэттэрин күүстэринэн тэриллэр.

Дьулурҕантан: Анатолий Николаевич Константинов 1952 с. ахсынньы 6 күнүгэр төрөөбүтэ. Бастакы тренерэ – И.А. Халдеев. Хабаровскайдааҕы физкултуура институтун выпускнига (1974 c.).

Көҥүл тустууга ССРС, хурешка РСФСР, хапсаҕайга Саха АССР спордун маастардара. Сэбиэскэй Сойуус тыатын сирин бөҕөстөрүн чемпиона (1979), Саха сирин 10 төгүллээх чемпиона (7-тэ көҥүл тустууга,  3-тэ хапсаҕайга), бэтэрээн-маастардарга аан дойду икки төгүллээх чемпиона, норуоттар икки ардыларынааҕы турнирдар, хамаанданан табаарыстыы көрсүһүүлэр кыайыылаахтара.

Саха Республикатын үтүөлээх тренерэ (1990). Олоҕун тиһэх сылларыгар Суоттутааҕы “Эрэл” спорткомплекс дириэктэринэн, “Эрэл” бааһынай хаһаайыстыба баһылыгынан үлэлээбитэ.

1997 сыллаахха муус устар 15 күнүгэр биһиги кэккэбититтэн туораабыта.

Петр ПАВЛОВ.