Анатолий Константинов аатын үйэтитии салҕанар

Уус Алдан улууһун Суотту сэлиэнньэтигэр көҥүл тустууга Саха сирин 7, Манчаары спартакиадатын хапсаҕайга 3, бэтэрээн-маастардарга аан дойду чемпионатын 2 төгүллээх кыайыылааҕа, Саха АССР, РСФСР, ССРС спордун маастара, Саха Республикатын үтүөлээх тренерэ Анатолий Николаевич Константинов кэриэһигэр көҥүл тустууга республикатааҕы XIII турнир ыытылынна.

Күрэхтэһии кэмигэр, А.Н. Константинов бэйэтэ сүүрэн-көтөн, көҕүлээн туттарбыт уонна “Эрэл” диэн ааттаабыт спордун саалатыгар, иккис этээскэ киниэхэ аналлаах быыстапка үлэлээтэ. Биһиги, тустуу быыһыгар ону киирэн көрдүбүт. Быыстапканы олохтоох библиотека үлэһиттэрэ сүрүннүүллэр эбит. Кинилэртэн кылгастык билиһиннэрэллэригэр көрдөстүбүт.

Суотту модельнай библиотекатын сэбиэдиссэйэ Раиса Николаевна Черкашина:

-Бүгүҥҥү быыстапкаҕа биһиги, суоттулар киэн туттар биир дойдулаахпыт, маастардар ортолоругар аан дойдуга икки төгүллээх чемпион Анатолий Николаевич Константиновка уонна нэһилиэкпит спортсменнарыгар аналлаах маннык хос тэриллибитэ, үс сыллааҕыта.

Ол иннинэ эмиэ маннык быыстапканы Евдокия Иннокентьевналаах туруора сылдьыбыттара, кини матырыйаалларынан. Бу хоһу биһиэхэ олохтоох дьаһалта биэрэн, биһиги манна, библиотекаҕа баар туох баар матырыйаалларбытын аҕалан уонна Анатолий Николаевич тус бэйэтин наҕараадаларын, араас матырыйаалларын, вымпелларын туруораммыт, маннык музей-хос оҥорон таһааран үлэлэтэбит.

-Наһаа үчүгэй эбит, биир киһиэхэ анаммыт музей-хос диэтэххэ, дириҥ ис хоһоонноох, манна көрөөччүлэр болҕомтолорун ордук тардар экспонаттар ханныктарый?

-Манна Анатолий Николаевич бэйэтэ хара көлөһүнүнэн тустан ылбыт кубоктара тураллар, хаартыскалара, чемпионскай лиэнтэлэрэ, мэтээллэрэ, бэйэтэ иилинэ сылдьыбыт значоктара бааллар. Бу, биһиги биир дойдулаахпыт “Мичээр” сынньалаҥ киинигэр өр сыл худуоһунньугунан үлэлээбит сүрдээх талааннаах киһи, Саха Республикатын култууратын туйгуна Афанасий Михайлович Охлопков 1997 сыллаахха үөлээннээҕэ Анатолий Николаевич мэтириэтин уруһуйдаабыта турар.

-Манна эһиги дьоннору хайдах быһыылаахтык сырытыннараҕыт?

-Бу, спорт саалатыгар тэриллэр улахан таһымнаах тэрээһиннэргэ дьоннорго көрдөрөбүт, кэпсиибит. Итиэннэ кэмиттэн кэмигэр нэһилиэккэ кэлбит ыалдьыттарга көрдөрөбүт, оскуола оҕолоругар кылаас чаастара ыытыллааччылар.

-Бүгүҥҥү күрэхтэһиигэ кэлбит дьон бу быыстапканы төһө сэргээтилэр, туох диэн санааларын үллэстэллэрий?

-Син элбэх киһи киирэн көрдө. Ордук, оччотооҕу хаартыскалары хасыһан көрөллөр. Бу урукку хаартыскалар, альбомнар бөҕө сыталлар. Олорго бэйэлэрин көрөн үөрэллэр, кэрэхсииллэр. Анатолий Николаевич малын-салын бииргэ тустубут дьоно уруккуттан билэллэр аҕай эбит. Холобур, Алексей Львов “Тэлэмээт” диэн, Анатолий Николаевиһы кыра эрдэҕинэн таптаан ааттыыр аатынан кэпсээнэ баар. Ол кэпсээни дьон эмиэ сэҥээрэр. Итиэннэ Екатерина Константиновна Местникова киниэхэ анаабыт хоһооно баар. Ол эмиэ кэрэхсэтэр. Бу, Анатолий Николаевич бэйэтэ Канадаҕа сылдьан кэлэн баран ахтыы суруйбута сытар. Бу интэриэһинэй, ханна да тахса, бэчээттэнэ илик суруйуу.

-Сиһилии көрдөрүүгүт, билиһиннэриигит иһин махтал! Биллиилээх бөҕөс Анатолий Константинов аатын үйэтитэн музей-хоскут сайда, экспоната элбии, дьону-сэргэни кэрэхсэтэ турдун!

Петр ПАВЛОВ.

Ааптар хаартыскалара.