Ааҕан элбэх сонуну сомсуоххут

Орто дойдуга кэлбит киһи ааҕан, суруйан сайдан билиини баһылаатаҕа. Билиҥҥи тэтимнээх олохпут күннээҕи хардыытын билиһиннэрэр, көрдөрөр эйгэ сүрдээх киэҥ. Көрдөрөр-иһитиннэрэр эйгэ барыта бириэмэнэн хааччах, оттон хаһыат, сурунаал – олох араас эйгэтин барытын хабар буолан, интэриэһинэй.

Аҕыс уон сэттис хаарбар үктэнээри да сырыттарбын – хаһыаттарга, сурунаалларга уон биэс сааспыттан мэлдьи сурутабын, барытын тиһэн уура сылдьабын. 1993 сылтан тахсар «Забота-Арчы» хаһыат – олус табыллыбыт хаһыат диэн сыаналыыбын. Бу үс хаһыат холбоспутун, оннооҕор сурутар түөрт атын хаһыаппыттан саамай ордоробун, күүтэбин. Олох араас эйгэтин хабара киэҥин таһынан, үөрэтэрэ-такайара, сүбэлиирэ-амалыыра, билиини-көрүүнү тургутара…

Оттон “Дьулурҕан” – бу спорт. Саха сирин спортсменнарын араас спорт көрүҥнэригэр ситиһиилэрин, уруккуну-хойуккуну, историяны сиһилии мантан ааҕан билсэбит. Ону таһынан аан дойду, Россия күрэхтэһиилэрин, биирдиилээн чулуу спортсменнар, тренердэр, тэрийээччилэр, улуустар, нэһилиэктэр, түөлбэлэр, оҕо спорда, ыччаттар тустарынан сырдатарын астынабын.

Күндү Сахам сирин олохтоохторун “Забота-Арчы” хаһыакка бука диэн суруттарыҥ, удамыр сыанаҕа элбэх сонуну сомсуоххут, сүбэни-аманы ылыаххыт, билиигитин-көрүүгүтүн хаҥатыаххыт.

Дмитрий СЫРОМЯТНИКОВ – Кэрэһиннээх, Россия үөрэҕириитин туйгуна, СР спорка үтүөлээх үлэһитэ, СР ХХ үйэҕэ спорка лауреата, Мэҥэ Хаҥалас улууһун, I Наахара, I Мэлдьэхси, Дьаҥхаады, Бүтэйдээх, Догдоҥо нэһилиэктэрин ытык олохтооҕо.