Музей саҥардылынна, тупсарылынна!

Бэҕэһээ убайым төрөөбүт күнэ этэ. Анатолий Николаевич Константинов аатын үйэтитэн дойдутугар Суоттуга туттарбыт физзала Анатолий Николаевич аатын сүгэр, Анатолий аатынан уулусса баар. 1997 с. Суотту нэһилиэгин администрацията, тэрилтэлэрэ, олохтоохторо уонна аймахтара Анатолий Николаевич Константинов аатын үйэтитэн көҥүл тустууга республиканскай турнир ыыталлар.

2014 с. 9-с республиканскай турниртан саҕалаан көҥүл тустууга уонна хапсаҕайга ыытыллар буолбута. 2022 сыллаахха А.Н. Константинов төрөөбүтэ 70 сылын туолбут сылыгар — көҥүл тустууга уонна хапсаҕайга республиканскай турнир Суоттуга ыытыллыбыта. Быйыл  ахсынньы 26 күнүгэр Суоттуга Анатолий Николаевич Константинов аатын үйэтитэр көҥүл тустууга уонна хапсаҕайга республиканскай турнир буолар.

Анатолий бииргэ үөрэммит үөлээннээхтэрэ, доҕотторо эрэнэбит. Биһиги А.Н. Константинов олоҕун эдэр ыччаты иитиигэ, көҥүл тустуу, хапсаҕай сайдарын туһугар элбэх көлөһүнүн тохпут, нэһилиэгэр, улууһугар, республикаҕа спорду пропагандалаабыт киһибитин кэриэстээн, буолаары турар республиканскай турнира улуус, республика өттүттэн өйөбүл ылан, үрдүк таһымнаахтык барыа диэн эрэнэбит. Ахтыыны суруйдулар Доруобуйа харыстабылын туйгуна, Бороҕон нэһилиэгин бочуоттаах олохтооҕо Т.У. Новоприезжая уонна 1970 с. Тумул орто оскуолатын бүтэрбит выпусниктар.

Татьяна убайым туһунан бэркэ суруйбут. Махтанабын! Бэҕэһээ кини төрөөбүт күнүгэр, хата сөп түбэһиннэрэн училищем музейын адм корпуһуттан, үөрэнэр (учебнай) корпуска көһөрөн, чөлүгэр түһэрэн оҥорон, саҥалыы арыйдым. Республиканскай Военизированнай күрэх УОРга ыытыллар кэмигэр, орто үөрэх кыһатын 13 хамаандата кэлэн кытынна. Күрэхтэһии кыттыылаахтара уонна ыалдьыттар музейы көрдүлэр-иһиттилэр. Манна Россия Героя «Алеша» танк ыытааччыта (водила) Филипп Евсеев кэлэ сылдьан музейы көрдө. Кини экскурсияны биһирээтэ. Герой знагын тутан-хабан көрдүм. Сулус кэннигэр “Герой России” диэн суруктаах уонна нүөмэрдээх эбит. Биһиги, ССРС спордун маастардарын колодкатын кэннигэр эмиэ хаһыс маастар буоларбыт нүөмэрэ сурулла сылдьар.

Аны кинорежиссер Никита Аржаков күрэххэ кэлэн, музейга 1972 сыллаах олимпийскай комплект мэтээллэри бэлэх уунна. Ону уталыппакка, Роман Дмитриев, Огнян Николов, Ибрагим Джавади мэтириэттэригэр ыйыталаан кэбистим. Көстүүтэ бэрт буолла, музей экспоната элбээтэ. Онон эмиэ махтанабын! Республика спорт музейдарын салайааччыта М.Е. Друзьянов сырытта, эмиэ биһирээтэ.

Николай КОНСТАНТИНОВ, Р.М. Дмитриев аатынан Олимпийскай эрэл училищетын Спорка албан аат музейын салайааччыта.

PS: Көҥүл тустууга ССРС спордун маастара, Саха АССР үтүөлээх тренерэ, норуоттар икки ардыларынааҕы категориялаах судьуйа, Уус Алдан улууһун бочуоттаах олохтооҕо Николай Николаевич Константинов бүгүн, ахсынньы 7 күнүгэр төрөөбүт күнэ. Онон кинини эҕэрдэлиибит! Санаабыт санаата саллаллан, толкуйдаабыт толкуйа тобуллан, олоххо киирэн истиннэр! Кытаанах доруобуйаны, тус олоҕор, дьонугар-сэргэтигэр нус-хас этэҥҥэ олоҕу баҕарабыт.

“Дьулурҕан”.