Тустуу бүттэ, тустуу салҕанар…

Улуу тренер Д.П. Коркин аатынан норуоттар икки ардыларынааҕы турнир дуораана өссө да уҕарыйа илигинэ, сэтинньи 22-23 күннэригэр «Өрөгөй» Спорка бэлэмнэнии киинигэр Россия спордун маастара, Ил Түмэн депутатынан талыллан үлэлии сылдьыбыт Александр Крылов кэриэһигэр көҥүл тустууга Бүтүн Россиятааҕы IV турнир ыытыллар.

Дьокуускай куорат спортивнай тустууга федерациятын салайааччыта, спорт маастара Николай Адушинов биһиэхэ иһитиннэрбитинэн, бу сырыыга күрэхтэһиигэ Кемеровскай, Красноярскай, Забайкальскай, Хабаровскай кыраайдартан, Бурятияттан, Тываттан, Иркутскай, Новосибирскай уобаластартан, Пермьтэн, ону тэҥэ Монголия, Таджикистан бөҕөстөрө кыттыахтара.

Күрэхтэһии сүрүн судьуйатынан Абакар Абиев (Хабаровскай), сүрүн суруксутунан Василий Уйгуров (Дьокуускай) улэлиэхтэрэ.

Наҕараадалары билиһиннэрдэххэ, ыйааһын ахсын бастаабыттар — 70, иккистээбиттэр — 50, үһүс буолбуттар 30-туу тыү. солк. харчынан бэлиэтэниэхтэрэ. Кыайыылааҕы бэлэмнээбит тренер 20000 солк. наҕараадаланыа. Ону тэҥэ анал бириистэр баар буолуохтара.

Тустууну таптааччылар кэрэхсэбиллэрин ылбыт түһүлгэ сүрүн үбүлээччилэринэн «Саханефтегазсбыт» тэрилтэ (генеральнай дириэктэр аан дойду икки төгүллээх чемпиона, спорт үтүөлээх маастара Виктор Лебедев) уонна «Строительнай» рынок (генеральнай дириэктэр, спорт маастара, Ил Түмэн депутата Иван Данилов) буолаллар. Маны таһынан бирииһинэн көмөлөһөөччүлэр элбэхтэр.

Биллэрин курдук, күрэхтэһии түмүгүнэн кыайыылаахтарга анаан үгэс быһыытынан сүрүн бириис оонньонуо. Быһаарыылаах хапсыһыылары, өрөбүл күн «Саха» национальнай көрдөрөр хампаанньа көрдөрөр.

Санатан эттэххэ, былырыын Александр Крылов аатынан турнир кыайыылаахтарынан буолбуттара: 57 кг – Аяндай Ондар (Тыва), 61 кг – Кежик Монгуш (Иркутскай), 65 кг – Кежик Чымба (Красноярскай), 70 кг – Айсен Потапов, 74 кг – Константин Капрынов (иккиэн Саха сирэ), 79 кг – Никита Сучков, 86 кг – Дмитрий Зайнидинов (иккиэн Красноярскай), 92 кг – Буянто Шадапов (Бурятия), 97 кг – Константин Пшеничников (Кемерово), 125 кг – Харысхан Баппаҕай (Хотугу Осетия-Алания).

Петр ПАВЛОВ.    

Ааптар хаартыската.