Такара Суда финалга таҕыста

Бүгүн Япония көҥүл тустууга студеннарга чемпионата саҕаланна. Бастакы күн түмүгүнэн бары ыйааһыннарга финалистар билиннилэр. Бу күрэхтэһиини биһиги, сэтинньи 15-16 күннэригэр Дьокуускайга ыытыллар улуу тренер Д.П. Коркин кэриэһигэр норуоттар икки ардыларынааҕы турниры кытта ситимниибит.

Тоҕо диэтэххэ, Коркин турнирын тэрийээччилэрэ, Японияттан сэттэ тустуук кэлэр, визалара бэлэм диэн иһитиннэрбиттэрэ. Ол кэлиэхтээх бөҕөстөртөн хас да киһи бүгүн күрэхтэстэ. Кинилэртэн Дайто Кацуме 57 киилэҕэ уонна Такара Суда 61 киилэҕэ утарсааччыларын кыайталаан, финалга таҕыстылар. Иккиэн Яманаси Гакуин университетын студеннара. Манна сыһыары тутан эттэххэ, Дьокуускайга Япония хамаандатын салайан аҕалыахтаах Юки Такахаси ити университекка тренеринэн үлэлиир.

Билэргит курдук, Япония тустуута билигин күүһүрэн турар. Кинилэргэ бэйэлэригэр элбэх күрэхтэһиилээхтэр. Хас ыйааһын ахсын 3-4 тэҥ таһымнаах тустууктардаахтар. Кинилэр аан дойду түһүлгэтигэр төһө баҕарар ситиһиилээхтик кыттар кыахтаахтар.

Ол курдук, Япония студеннарга чемпионатын быһаарыылаах хапсыһыыларыгар биллэр-көстөр бөҕөстөр бааллар эбит. Холобур, Загребка ыытыллыбыт аан дойду чемпионатыгар 74 киилэҕэ бастаабыт Кота Такахаси ыйааһынын өрө таһааран, 86 киилэҕэ утарсааччыларын кыайталаабыт.

Ити курдук, аан дойду чемпионатын 97 киилэҕэ боруонса призера, алтынньы ый түмүгүнэн UWW быһаарыытынан аан дойду бастыҥ бөҕөһүнэн ааттаммыт Араш Йошида финалга холкутук тахсыбыт. Интэриэһинэйэ диэн, кини финалга бииргэ төрөөбүт быраата, бу иннинэ гректии-римнии тустуунан дьарыктаммыт Тайдзо Йошиданы кытта киирсиэҕэ. Финалга тахсар иһин киирсиилэргэ Араш уонна Тайдзо утарсааччыларын очукуонан ыраастык кыайталаабыттар.

Финалга тахсыбыттартан өссө Юта Нисиучи (65 кг), Кейичи Каредаги (79 кг), Риносуке Камия (79 кг) диэн норуоттар икки ардыларынааҕы таһымҥа биллэн эрэр эдэр бөҕөстөрү бэлиэтиэххэ сөп. Ыарахан ыйааһыҥҥа — билигин Японияҕа үөрэнэ сылдьар казах Абилай Совет уонна монгол Батбаяр финалга тахсыбыттар.

Бу туһунан Япония спортивнай тустууга федерациятын анал сайта суруйар.

Онон дьэ, Коркин турнирыгар кэлиэхтээх Дайто Кацуме уонна Такара Суда финалга хайдах тусталларын сарсын билиэхпит. Дьэ, Япония тустууктара уоскуйбат дьон эбит. Күрэхтэһииттэн – күрэхтэһиигэ кыттан, буһан-хатан улахан ситиһиилэнэллэр диэххэ сөп.

Петр ПАВЛОВ.