Сарсын дьэ, Капрынов – Рассадин! Хайалара кыайар?

// Дмитрий Коркин аатынан норуоттар икки ардыларынааҕы күрэхтэһииттэн санаалар.

Саха сиригэр күүтүүлээх күрэхтэһии — көҥүл тустууга улуу тренер Дмитрий Петрович Коркин аатынан норуоттар икки ардыларынааҕы күрэхтэһии! Күрэхтэһии бүгүн бастакы күнэ.

Максим Васильев (хаартыскаҕа ортоку), бэйэтин сааһыгар көҥүл тустууга республикаҕа 10-ча төгүл бастаан турар. Кини көбүөргэ 90 кг кэриҥэ ыйааһыннаахтары кытта тахсан хапсыһыылары ааспыт бөҕөс буолар. Бүгүҥҥү күрэхтэһии туһунан тустуук хараҕа тугу кэпсиир эбитий, санаата тугу этэрий:

—Дмитрий Петрович Коркин Саха сирин Улуу тренера, Россия талааннаах, элбэх көрдөрүүлээх тренердэриттэн биирдэстэрэ. Кини үөрэҕин үс олимпиец, 10-тан тахса норуоттар икки ардыларынааҕы маастар тустуук ааспыта.

Дмитрий Коркин аатынан көҥүл тустууга норуоттар икки ардыларынааҕы күрэхтэһиини Саха сирин салалтата, спорт Министерствота үрдүк таһымнаахтык тэрийэллэр.

Күрэхтэһии Россия үгүс регионнарыттан элбэх тустуук кэлэн күрэхтэһэр. Аҕыйах сыллааҕыта Саха сиригэр Иран, Турция бөҕөстөрө кэлэн күрэстэспиттэрин бэлиэтиибит. Бу сырыыга, быйыл киэн туттар Улуу тренербит аатынан ыытыллар күрэхтэһиибитин Япония, Монголия сүүмэрдэммит хамаандалара киэргэтэллэр. Ону тэҥэ, биһиги ыалдьыттыы олорор республикаларбыт — Тыва, Бурятия уолаттара туста сылдьаллар.

Маастарыстыба өттүнэн Япония тустууктарын улаханнык хайҕаатым. Ону тэҥэ, бэйэбит уолаттарбыт тустуулара үчүгэй. Холобура, сарсын Виктор Рассадин уонна Капрынов киирсиитин күүтэбит. Хайалара кыайар? Дьэ итиннэ бэйэбит икки ардыбытыгар мөккүөр барар.

Арсен Осипов уолунаан Эрсанныын:

-Таһымнаах күрэхтэһии хайдах быһыылаахтык көрдөрөөрү уолбунаан кэлэн көрө сылдьабыт. Уолум бэйэтэ мас тардыһыынан дьарыктанар. Уол оҕо кыра эрдэҕиттэн туохха барытыгар тулуурдаах буола улаатыахтаах. Күрэхтэһиилэргэ элбэххэ сырыттахха, спортсмен бэйэтинэн күрэхтэстэҕинэ бэйэтигэр, биллэн турар, бэйэтигэр элбэҕи иҥэринэр.

Ньургустаана Птицына уолунаан Петя Колесов:

—Маннык буолар күрэхтэһиилэргэ барытыгар сылдьабыт, көрөбүт. Көҥүл тустууну саха киһитэ барыта интэриэһиргиир, күүтэр дии саныыбын. Тус бэйэм маннык санаалаахтарга кыттыһан тураммын, кэргэним, уолаттарым хапсаҕайдыыллар.

Биһиги Лев Павловка, Виктор Рассадиҥҥа, биир тылынан бэйэбит уолаттарбыт тустууларын, хамсаныыларын көрөөрү, ыалдьаары кэлэн турдахпыт. Холобура, атын дойду бөҕөстөрө биһиги уолаттарбыт утары таҕыстахтарына дьикти, интэриэһинэй иэйии үөскүүр, дьон сирэйэ-хараҕа туруута, ыһыыта-хаһыыта.

Япония тустууктара омуммар, киһиттэн сиэри таһынан күүстээхтэрэ буолуо дии санаабытым. Оннук кэпсэтии баар буолан санаалар үөскүүллэр буоллаҕа, дьиҥэ.

Сарсын дьэ, финал аҥарыгар, финал киирсиилэрэ буолуохтара дии. Саамай уота-күөһэ онно буолуоҕа.

Лидия Иванова, уола Артем Никитин. Лидия Иванова көҥүл тустууга Саха сирин аатын көмүскээбит тустуук кыыспыт буолар:

-Быйыл Дмитрий Коркин аатынан буолар норуоттар икки ардыларынааҕы күрэхтэһиигэ Япония дойдутун тустууктара кэлэннэр Саха сирин тустууну көрөөччүлэригэр, бэриниилээх ыалдьааччыларыгар улахан интэриэһи үөскэттэ.

Уолум Артем Владивосток куоракка туста бараары улахан тустууктар хайдах быһыылаах хапсыһыы ыыталларын көрөр, үөрэтэр. Көҥүл тустуу Саха сиригэр бастакы нүөмэр буоларынан, бүгүҥҥү күҥҥэ, элбэх дьиэ кэргэн кэлэн көрөр буолбута үксээтэ, ол харахха быраҕыллар.

Бэйэбит уолаттарбытыттан «либиргэччи» тустубут бөҕөстөрү көрөөччү бэйэтэ быһаарбыта буолуо. Уһата-кэҥэтэ барбакка тутуһан-хабыһан, приемнары оҥортоон барар тустууктар дьон ортотугар тустуу эйгэтин тута уларыталлар.

Харысхан ПОПОВ.

Ааптар хаартыскалара.