Сүрүн сыал – Ярыгин турнира

Улуу тренер Д.П. Коркин кэриэһигэр көҥүл тустууга норуоттар икки ардыларынааҕы турнир иннинэ “Дьулурҕан” хаһыат сайтыгар “Тус санаа” диэн рубрикаҕа “Коркин турнирын – сүүмэрдиир күрэхтэһии гыныахха” диэн санаабын суруйбутум. Онно син дьон санаатын үллэстибитэ. Сөбүлэһэр да, сөбүлэспэт даҕаны дьоннор бааллар.

Бу сырыыга, Коркин турнира түмүктэммитинэн ол санаабын салгыыбын. Турнир түмүгүнэн чугастааҕы кэмҥэ Саха сирин көҥүл тустууга хамаандатын быһа холуйан таллым. Хамаандаҕа киирдилэр:

57 кг: Лев Павлов, Егор Явловскай, Федор Постников, Любомир Ашеин.

61 кг: Александр Авелов, Ньургун Терентьев, Манчаары Ильинов, Петр Константинов

65 кг: Владислав Кривошапкин, Аслан Трофимов, Николай Шеглов

70 кг: Константин Капрынов, Анатолий Иванов, Игорь Матвеев

74 кг: Олег Фомин, Владимир Бояновскай, Иннокентий Бабаранов

79 кг: Дмитрий Павлов, Ньургун Степанов

86 кг: Степан Иванов, Андриан Ленскэй

92 кг: Ньургун Сергин,

97 кг: Евгений Аронов

125 кг: Никита Софронов, Никита Хабаров.

Бу бөҕөстөрү бэлиэҕэ ылан, кинилэргэ усулуобуйа оҥорон, эһиилги сылга суоттанан үлэни ыытар үчүгэй буолуо этэ. Өссө бу өрөбүллэргэ буолар Александр Крылов кэриэһигэр Бүтүн Россиятааҕы турниры кэтээн көрүөҕүҥ.

Эппитим курдук, Саха сирин хамаандатын чугастааҕы соруга Россия Кубогар (сэтинньи 27-30 күннэрэ) уонна ахсынньыга Д.Г. Миндиашвили турнирыгар ситиһиилээхтик кыттыы буолуохтаах. Оттон сүрүн сорук, 2026 сыл саҥатыгар Красноярскайга буолар Иван Ярыгин аатынан норуоттар икки ардыларынааҕы турнир буолара саарбаҕа суох. Дьэ, бу күрэхтэһиигэ билиҥҥиттэн былааннаахтык үлэлиэххэ.

Биллэрин курдук, Россия спортивнай тустууга федерациятын быһаарыытынан, буолан ааспыт Коркин турнирын кыайыылаахтара – Ярыгин турнирыгар кыттар быраабы ылаллар. Онон мин ааҕыыбар, билиҥҥи туругунан быйылгы Ярыгин турнирыгар уонна Россия чемпионатыгар эриэх-дэхси көрдөрүүлэммит Лев Павлов, Александр Авелов, Константин Капрынов номнуо Красноярскайга кытталлара биллэр. Кинилэргэ өссө Коркин турнирын кыайыылаахтара Олег Фомин, Ньургун Сергин, Никита Софронов эбиллэн биэрдилэр.

Онон бу ааттаммыт бөҕөстөр хаалбыт кэмҥэ, Ярыгин турнирыгар анал былаан быһыытынан үлэлиэхтэрин сөп дии саныыбын. Онон болҕомтону атыттарга ууруохха. Холобур, сотору кэминэн Тыва киин куоратыгар – Кызылга Россия Кубога ыытыллар. Онно эрдэттэн биллибитинэн, сайаапка быһыытынан Саха сирин хамаандата кыттар диэн сурулла сылдьар. Дьэ манна, Коркин турнирыгар ситиһиилээхтик кыттыбыт бөҕөстөртөн сүүмэрдээн хамаанда талыллыан наада. Манна даҕатан эттэххэ, урукку сылларга Россия Кубогар бастаабыттар эмиэ Ярыгин турнирыгар киллэриллэллэрэ.

Коркин турнирыттан да көрдөххө, билигин биһиэхэ 57, 61, 70 кг эрэ тэҥ таһымнаах хастыы эмэ тустууктар бааллар. Оттон атын ыйааһыннарга биирдии-иккилии эрэ, республика таһыгар ыытыллар эппиэттээх күрэхтэһиилэргэ балачча тустуон сөптөөх дьонноохпут.

Онон, мин санаам чопчу, бу кэмҥэ Саха сирин көҥүл тустууга хамаандата талыллан, үлэ саҕаланыахтаах. Эппитим курдук, сүрүн сыал – Ярыгин турнира. Онно чопчу мэтээл иһин киирсиэн сөптөөх эрэ бөҕөстөрбүт кытталларын ситиһиэхтээхпит (усунуос төлөөн киирии суох буолуохтаах). Санатан эттэххэ, уруккуттан билиҥҥэ диэри Ярыгин турнирын кыайыылаахтара Европа чемпионатыгар тусталлара. Ол иһин уруккуттан, көҥүл тустууга Саха сирин чемпионатын бу кэмҥэ оҥоруохха диэн этэ сатыыбын.

Бэйэм санаабар, бастатан туран, тустуу систиэмэтэ сөптөөхтүк оҥоһуллуохтаах. Ыытар, сүүмэрдиир күрэхтэһиибит онно сиэттэрэн тэриллиэхтээхтэр. Ол эбэтэр, ханнык баҕарар республика чиэһин көмүскүүр хамаанда састааба эрдэ ыытыллыбыт сүүмэрдээһин эрэ түмүгүнэн оҥоһуллуохтаах, бэрээдэктэниэхтээх. Холобур, билигин талыллыбыт састаап аны сайын Россия чемпионатыгар диэри (сыл анаара курдук) анал оҥоһуллубут графиктаах үөрэтэр-эрчийэр түмсүүлэргэ, күрэхтэһиилэргэ кыттыахтаах. Тустуубут салалтата, федерация маныаха туох-хайдах былааннаахтара буолла?

Чэ, мин санаам ити курдук. Сэҥээрбит буоллаххытына, бэйэҕит санааҕытын суруйуҥ. Тустуубут сайдарын, бөҕөстөрбүт ситиһиилэнэллэрин туһугар санаабытын холбуоҕуҥ. Кыымтан – уот саҕыллар!

Петр ПАВЛОВ.