Муҥха кэмэ

Сэтинньи – Байанай ыйа. Бу күннэргэ үгэс быһыытынан, «ZEMA» өрөспүүбүлүкэтээҕи ыччат уопсастыбаннай тэрилтэтин актыбыыстара, Аянитов Никита салалталаах, Хаҥалас улууһун Нөмүгү нэһилиэгэр муҥхалаан кэллибит.

Устудьуоннары уонна олохтоохтору таһынан муҥхаҕа СӨ Ыччат дьыалатыгар уонна социальнай коммуникацияларга миниистирэ Петр Виталиевич Шамаев, ХИФУ УСР салайааччыта Степан Борисович Слепцов сырыттылар.

Өбүгэ төрүт дьарыгын эппитигэр-хааммытыгар илдьэ сылдьар урааҥхай сахалар, төһө да куоракка олордорбут хааммыт тардан, бэйэбит баҕабытынан муҥхаҕа кыттыстыбыт. Саха сирин араас муннуктарыттан – илин эҥээртэн, бүтэй Бүлүүттэн, таас хайалардаах хотуттан, Эркээни уонна Эҥсиэли хочотун ыччаттара бары манна муһуннубут. Ону тэҥэ М.К. Аммосов аатынан ХИФУ «NEFU INTERNATIONAL» Кытайтан, Сирияттан, Казахстантан о.д.а. дойдулартан кэлэн үөрэнэр устудьуоннар саха төрүт үгэһин көрдүлэр-иһиттилэр, бэйэлэрин холонон көрдүлэр.

Мустубут дьон улахан аҥаара сытыытык, сылбырҕатык туттан ньырыыһыттаатыбыт, кыахтаах уолаттар анньыынан мууһу дьөлөн үлэ тутаах дьоно буоллулар. Олохтоох эр дьон көмүс хатырыктааҕы күһүн хайдах муҥхалыылларын эдэрдэргэ көрдөрдүлэр. Балыктааһыны тэрийии, салайыы эмиэ туспа үлэ буолар.

Муҥха бүтүүтэ күөскэ балык буһар кэмигэр уолаттарбыт хапсаҕайдаһан туһуннулар. Муҥутуур кыайыылааҕы быһаарар киирсии тэрийдибит. «Zeма» уолаттара, нэһилиэк дьоно тымныыны аахсыбакка сыбыдахтанан хапсаҕайдаһан туһуннулар. Хабыр хапсыһыылар түмүгэр, сылбырҕа хамсаныылаах, түргэн туттуулаах Үөһээ Бүлүү хапсаҕайга оскуолатын иитиллээччитэ Денис Федоров бэйэтин үөлээннээҕин, эмиэ Үөһээ Бүлүү уолун Мирко Брощевы быраҕан кыайыылааҕынан тахсан, миниистир Петр Виталиевичтан 10 тыһыынча уу харчыннан бириис тутта.

Инньэ гынан, кыһалла-мүһэллэ балыктаабыт дьоҥҥо Күөх Боллох Тойон балыгын бэристэ, күндүлээтэ. Куоракка хаайтаран сыппыт дьон айылҕаҕа тахсан, Хаҥалас сирин кэрэ көстүүлэрин көрөн, астына-дуоһуйа балыктаан, сынньанан кэллибит.

Тэрийээччилэргэ уонна Нөмүгү нэһилиэгин олохтоохторугар барҕа махтал тылбытын этэбит!

Анжелина ЖДАНОВА, ХИФУ устудьуона, Ньурба улууһун «Баай Тиит» ыччатын түмсүүтүн актыбыыһа.