Михаил Пахомов: “Үрдүк таһымнаахтык тэрийэргэ дьулуһабыт”

«Өрөгөй» Спорка бэлэмнэнии киинин дириэктэрэ Михаил Дмитриевич Пахомов «Тайм-аут» биэриигэ ыалдьыттаата.

Кини, биэриини ыытааччы, суруналыыс Николай Бястиновка Киин ыытар үлэтин, спортсменнар ситиһиилэрин, инники соруктары билиһиннэрдэ. Биэрии сүрүн кэпсэтиитэ, сэтинньи 15-16 күннэригэр буолар, улуу тренер Дмитрий Петрович Коркин кэриэһигэр көҥүл тустууга норуоттар икки ардыларынааҕы турнирга бэлэмнэнии хаамыытын туһунан буолла.

Ол курдук, турнирга Саха сирин хамаандатын сүрүн састааба (Лев Павлов, Александр Авелов, Константин Капрынов, Ньургун Сергин, Никита Хабаров) барыта кыттарын, күрэхтэһиигэ 10-ча дойдуттан быһа холуйан 170-200 бөҕөс кыттарын, «Саха» НКИХ тустууну быһа көрдөрөрүн, күрэхтэһии кэмигэр «Өрөгөй» иккис этээһигэр оҕолорго аналлаах аралдьытар-сааратар хос үлэлиирин, турнир үрдүк таһымнаахтык барарын инниттэн билигин элбэх тэрээһин боппуруостарга үлэлэр ыытылла туралларын сиһилии кэпсээтэ.

Японецтар тустууларын көрүөхпүт

Быйылгы турнир биир кэрэхсэбиллээх түгэнинэн, хас да сыллаах тохтобул кэнниттэн Япония хамаандата кэлэрин туһааннаах министиэристибэ, тэрилтэлэр күүстэринэн кэпсэтэн ситиһии буолла.

Михаил Дмитриевич, японецтары кытта спорка, чуолаан тустууга Саха сирин сыһыана уруккуттан үчүгэйин санатта. Ол курдук, өссө “Өрөгөй” урукку салайааччыта А.А. Игнатьев көҕүлээһининэн биһиги бөҕөстөрбүт икки төгүл Токиоҕа тиийэн анал бэлэмнэниини барбыттарын, соторутааҕыта опыт атастаһарга тренер Василий Неустроевы ыыта сылдьыбыттарын санатта.

Ханнык дойду бөҕөстөрө кэлиэхтэрэй?

Буолаары турар XVI турнирга Японияны кытта өссө Монголия, Азербайджан, Кыргызстан, Таджикистан, Куба, Соҕуруу Корея, Узбекистан, Молдова, Беларусь о.д.а. тас дойду бөҕөстөрө кытталлара биллибит. Кэпсэтии өссө даҕаны салгыы бара турар эбит.

Саха сириттэн 90-ча бөҕөс кыттарга бэлэмнэнэр диэн буолла. Ону тэҥэ, Россия араас регионнарыттан күүстээх тустууктар кэлиэхтэрэ. Номнуо, Красноярскай кыраай, Бурятия састааптара биллэр.

Бириистэр тустарынан

Бириистэр тустарынан эттэххэ, хас ыйааһын аайы бастаабыттар – 200, иккистээбиттэр – 100, үһүс буолбуттар – 75 тыһ. солк. харчынан бириэмийэлэниэхтэрэ. Кыайыылааҕы бэлэмнээбит тренер 25 тыһ. солк. харчынан наҕараадаланыа.

Ону тэҥэ, ыалдьааччылар быһаарыыларынан, түһүлгэ бастыҥ бөҕөһүгэр үгэс быһыытынан, «Үрүҥ көмүс борцовка» бирииһэ туттарыллыа.

Судьуйалар кимнээҕий?

Биэрииттэн салгыы билиһиннэрдэххэ, турнир сүрүн судьуйатынан Владимир Секлецов (Кемерово), кини солбуйааччыларынан Алексей Базулин, Нона Арустамян (Москва) үлэлииллэрэ этилиннэ. Биһигиттэн билиҥҥи кэмҥэ бастыҥ судьуйалар: Виктория Барашкова, Вячеслав Кривошапкин, Николай Николаев, Дьулустаан Сивцев уо.д.а. үлэлиэхтэрэ.

Бочуоттаах ыалдьыттар…

Оттон түһүлгэ бочуоттаах ыалдьыттарынан көҥүл тустууга олимпийскай чемпионнар: Сергей Белоглазов, Махарбек Хадарцев, Хаджимурат Гацалов, Парижтааҕы-2024 оонньуу 86 киилэҕэ кыайыылааҕа Магомед Рамазанов буолаллара күүтүллэр.

Киирии билиэтинэн – бириистэр

Итини таһынан биэрии кэмигэр М.Д. Пахомов, киирии билиэттэринэн сыаналаах бэлэхтэр оонньоноллорун эттэ. Ол курдук, убаһа, саа, мебель, уматык, маҕаһыыннартан сертификаттар…

Биэрии бүтүүтүгэр биир истээччи, биһиги хамаандабыт төһө кыһыл көмүс мэтээлгэ суоттанарый диэн оруннаах ыйытыытыгар, Михаил Дмитриевич: “Аччаабыта 3-4 киһи бастыахтаах”, — диэтэ. Көбүөр көрдөрүө.

Күрэхтэһиилэр, күрэхтэһиилэр…

Манна сыһыары тутан эттэххэ, Д.П. Коркин турнирын кэнниттэн биир нэдиэлэнэн Александр Крылов кэриэһигэр көҥүл тустууга Бүтүн Россиятааҕы турнир ыытыллар.

Оттон ахсынньы 6 күнүгэр профессиональнай боксаҕа «Вызов Севера» турнир буолуоҕа. Онон биһигини элбэх күрэхтэһиилэр күүтэллэр.

Барыгытын сэтинньи 15-16 күннэригэр буолар Тустуу бырааһынньыгар, “Өрөгөйгө” ыҥырабыт!

Петр ПАВЛОВ.