Коркин турнирын – сүүмэрдиир күрэхтэһии гыныахха

ССРС, РСФСР, САССР үтүөлээх тренерэ Дмитрий Петрович Коркин кэриэһигэр көҥүл тустууга норуоттар икки ардыларынааҕы түһүлгэ урукку сылларга күһүн ыытыллар эбит буоллаҕына, быйылгы турнир кыһыҥҥы кэмҥэ буолар. Сыл түмүктэнэн эрэр. Бу күрэхтэһиигэ, билиҥҥи кэмҥэ бэлэмнээх бөҕөстөрбүт, сүүсчэкэ киһи кыттар.

Манан сибээстээн, уруккуттан этэр санаабынан, бу кэмҥэ, туох баар күүстээхтэрбитин барытын түмэн Саха сирин чемпионата ыытыллыахтааҕа диирим. Ол чемпионат түмүгүнэн чугастааҕы кэмҥэ буолар күрэхтэһиилэргэ, холобур, бастаан Д.Г. Миндиашвили, оттон И.С. Ярыгин аатынан турнирдарга кыттар республика хамаандата талыахха сөбө.

Онон быйылгы Коркин турнирын түмүгүнэн, ыйааһын аайы үстүү киһини талан, Саха сирин хамаандатын сүүмэрдээн, анал бэлэмнэниилэри, усулуобуйаны тэрийиэххэ дии саныыбын.

Сүүмэрдэммит хамаанда бастаан Тываҕа ыытыллар Россия Кубогар кытыннын. Манна даҕатан эттэххэ, Коркин турнирыгар бастаабыттар – Ярыгин турнирыгар кыттар быраабы ылаллар. Ол эмиэ быһаарыылаах түгэн. Билиҥҥи бастакы сорук мин санаабар, Ярыгин турнирыгар элбэх путевканы ылыы буолар. Сыал-сорук онно туһуланыахтаах.

Бастыҥнары талыы уонна сүрүн күрэхтэһиилэргэ кимнээх кытталларын быһаарыы систиэмэтэ чопчуланыахтаах. Барыта ситимнээх буолуохтаах.

Маннык санааны эһиги туох дии саныыгыт?

Петр ПАВЛОВ.