Коркин-2025: Түһүлгэ тугу тосхойор?

Дьэ, өр күүппүт күрэхтэһиибит – улуу тренер Дмитрий Петрович Коркин аатынан көҥүл тустууга норуоттар икки ардыларынааҕы XVI түһүлгэ саҕаланар күнэ үүннэ.

Быйылгы күрэхтэһиигэ – Австралия, Азербайджан, Беларусь, Куба, Япония, Кыргызстан, Корея, Молдова, Монголия, Македония, Таджикистан дойдуларыттан, Бурятия, Хотугу Осетия, Тыва, Саха Республикаларыттан, Воронеж, Иркутскай, Кемерово, Красноярскай, Новосибирскай, Пермь, Хабаровскай куораттартан барыта 215 бөҕөс сэрэбиэйи ааста.

Ыйааһыннарынан ылар буоллахха, 57 кг – 41, 61 кг – 30, 65 кг, 37, 70 кг – 24, 74 кг – 24, 79 кг – 15, 86 кг – 12, 92 кг – 15, 97 кг – 9, 125 кг – 8 кыттааччылар бааллар.

Оттон сэрэбиэйи көрдөххө, күүстээх соҕус састааптаах диэбит ыйааһыннарыгар бастыҥнары туспа бөлөхтөргө араарбыттар. Холобур, 57 кг Лев Павлов (Саха сирэ) – Дайто Кацуме (Япония), 61 кг Александр Авелов (Саха сирэ) – Кежик Монгуш (Тыва), 70 кг Константин Капрынов (Саха сирэ) – Виктор Рассадин (Таджикистан), 92 кг Ньургун Сергин (Саха сирэ) – Дмитрий Зайнидинов (Красноярскай), 125 кг Никита Хабаров (Саха сирэ) – Остап Пасенок (Кемерово).

Дьэ, бу дьонтон төһөтө, суолу солоон быһаарыылаах хапсыһыыга тиийэрин көбүөр эрэ билэн эрдэҕэ.

Манна даҕатан эттэххэ, быйылгы түһүлгэҕэ састаап тэҥ сыһа күүстээх диэххэ сөп. Киһи ордук чорботор, эрдэттэн бастыыр диир киһитэ суоҕун тэҥэ.

Ол да буоллар, 57 киилэҕэ уолаттарбыт Лев Павлов, Федор Постников, Любомир Ашеин мэтээл иһин киирсэллэригэр эрэнэбит.

61 кг Александр Авелов, Петр Константинов, Артём Слепцов кыайыыга дьулуурдара быһаарыаҕа.

65 кг Эдуард Поповка, Виктор Яковлевка, Георгий Окороковка эрэнэбит.

70 киилэҕэ састаабы көрөн баран, баҕа санаа быһыытынан, быһаарыылаах хапсыһыыга Константин Капрынов уонна Виктор Рассадин көрсүөхтэрин баҕарабыт.

74 кг Владимир Бояновскай уонна Олег Фомин мэтээлгэ киирсэллэрэ буоллар.

79 киилэҕэ биһиги уолаттарбытыгар бириистээх миэстэҕэ киирэргэ ыарахан буолара буолуо.

86 кг Андриан Ленскэй бэйэтин дьиэтигэр-уотугар туох баарынан киирсэн кэбиһэрэ буоллар.

92 киилэҕэ кэнники кэмҥэ эриэ дэхситик тустар Ньургун Сергиҥҥэ бу да сырыыга эрэл улахан.

97 кг эдэр бөҕөс Евгений Аронов сэрэбиэйэ куһаҕана суох. Тоҕоостоох түгэни мүччү тутумуон наада.

125 кг Никита Хабаров, Никита Софронов уонна Харысхан Баппаҕай – ыалдьааччыларын үөрдэллэригэр баҕарабыт.

Күрэхтэһии бастакы эргииртэн саҕалаан күүрээннээх буолара күүтүллэр. Ол курдук, хара бастакыттан 57 кг Ямага (Япония) – Фокинов (Саха сирэ), 70 кг Потапов (Саха сирэ) – Корнеев (Кемерово), 79 кг Сивцев (Саха сирэ) – Будожапов (Кыргызстан), 86 кг Ленскэй (Саха сирэ) – Улимбашев (Красноярскай), 125 кг Софронов (Саха сирэ) – Пасенок (Кемерово) киирсиилэрэ сытыы, тыҥааһыннаах буолуо дии саныыбын.

Онон ааҕан-суоттаан көрдөххө, бастакы күн түмүгүнэн 7-8 уолбут финалга тахсыахтарын сөп курдук эрээри, биһиги санаабыт диэн – биһиги санаабыт, көбүөр дьиҥнээх күүстээхтэри быһаарыа. Ол да буоллар, биири чопчу этиэххэ сөп. Көрөөччүнү сэргэхситэр күүрээннээх, сытыы хапсыһыылар хайаан да баар буолуохтара. Уолаттарбытыгар ыалдьабыт!

Тустууну таптааччылар, сэтинньи 15 күнүгэр – субуотаҕа, күрэхтэһиини «күөх экранынан» быһа биэриини «Мамонт» каналга 10:00-16:00, 18:00-20:00 уонна «Саха» НКИХ 18:00-20:00 көрүөххүтүн сөп.

Петр ПАВЛОВ.