Күүс-көмө, өйөбүл буолбуттарга махтал!

Дьэ, спорт маастара, предприниматель, меценат, Ил Түмэн депутатынан талыллан үлэлии сылдьыбыт Александр Владимирович Крылов кэриэһигэр көҥүл тустууга Бүтүн Россиятааҕы күрэхтэһии үрдүк тэрээһиннээхтик ыытыллан түмүктэннэ.

Күрэхтэһии – Россия уонна Саха сирин спортивнай тустууга федерацияларын, Саха Республикатын физическэй култуураҕа уонна спорка министиэристибэтин көҕүлээһиннэринэн ыытылынна.

Турнир күннэринэн хаамыыта, түмүгэ балачча “күөх экранынан”, социальнай ситимнэринэн, сайтарынан сырдатылынна. Тустууну таптааччылар төһө да ыраах олордоллор, күрэхтэһии быһа биэриитин “Саха” уонна “Мамонт” каналларга билэ-көрө олордулар.

Оттон бу суруйууга биһиги, күрэхтэһии тэрээһинигэр күүс-көмө, өйөбүл буолбут дьоммутугар махталбытын биллэрэн, кинилэри чорботон бэлиэтиэхпитин баҕардыбыт. Ханныгын даҕаны иһин, маннык улахан таһымнаах күрэхтэһиини тэрийэн ыытыы элбэх түбүгү, сыраны эрэйэр.

Александр Крылов сырдык аатыгар тустууга күрэхтэһии, кини “Строительнай” рынокка бииргэ үлэлээбит доҕотторун, Дьокуускай куорат тустууга федерациятын, төрөөбүт оройуонун көҕүлээһиннэринэн 2022 сыллаахха аан бастаан тэриллэн, билигин этэргэ дылы, Россия спортивнай тустууга халандаарыгар биир таһымнаах күрэхтэһии быһыытынан сыаналанар. Турнир биир сүрүн уратыта диэн, кыайыылаахтарга 1 мөл. солк. уу харчыны тута туттарыы буолар. Тустуу күрэхтэһиитигэр атын сиргэ маннык дьаһал баара иһиллибэт. Оттон биһиги күрэхтэһиибит төрдүс сылын ыытылынна. Итиэннэ сырыы ахсын тэрээһинэ тупсан, састааба күүһүрэн иһэрин бэлиэтиэх кэриҥнээхпит.

Ол курдук, буолан ааспыт турнир сүрүн үбүлээччитинэн: Өймөкөөн улууһун дьаһалтата (спорт маастара, баһылык Оконешников Александр Савельевич), официальнай үбүлээччилэр: “Строительнай” рынок (спорт маастара, генеральнай дириэктэр Данилов Иван Иванович), “Саханефтегазсбыт” тэрилтэ (спорт үтүөлээх маастара, генеральнай дириэктэр Лебедев Виктор Николаевич) буоллулар.

Ити курдук, Р.М. Дмитриев аатынан Олимпийскай эрэл училищетын салалтата (дириэктэр Семен Сергеевич Чердонов) кытта кэлбит тустууктары, тренердэри, судьуйалары түһэриигэ сүҥкэн көмөнү оҥордо. Уонна биллэн турар, «Өрөгөй» Спорка бэлэмнэнии киинигэр (дириэктэр Михаил Дмитриевич Пахомов) дьиэтин-уотун туран биэрэн, күрэхтэһиини тэрийсибитэ кэрэхсэбиллээх. Көрөргүт курдук, бу, тустууттан тахсыбыт дьоһуннаах уолаттарбыт таптыыр көрүҥнэригэр бэриниилээхтэрин бэлиэтэ.

Оттон биирдиилээн күүс-көмө буоллулар: “Байанай центр” (генеральный дириэктэр Готовцев Степан Николаевич), “Медведь” (салайааччы Тарскай Михаил Михайлович) маҕаһыыннар, “Талбан строй” тутуу тэрилтэтэ (генеральнай дириэктэр Андрей Федоров), ООО ДЭП 132, АО ДЭП 135, ИП Джавадян А.Д., Пестерев А.Н., ООО Республика 2007, ООО Арктика 25, ООО Айрон-Групп, ООО Емеян, “Эгэлгэ” ювелирнай хампаанньа, Томпо оройуона, Сельское поселение Оймякон Полюс-Холода, MOBIFIX киин (салайааччы Винокуров Александр Альбертович), Филиппов Алексей Алексеевич, Өймөкөөн нэһилиэгэ (баһылык Васильев Павел Валентинович), Сиэллээх Эрчим-Мэн Хотой Сэмэн уола. Кинилэргэ барыларыгар барҕа махтал!

Биир өттүнэн ылан көрдөххө, А.В. Крылов бэйэтэ рынок салайааччытынан, тустуу федерациятыгар үлэлиир кэмигэр, таптыыр уонна бэйэтэ дьарыктаммыт көрүҥэр төһөлөөх көмөнү оҥорбута буолуой!? Ону өйдүүр уонна сыаналыыр буолан, кини доҕотторо, биир санаалаахтара түмсэн, үп-харчы бырахсан бу маннык улахан бириистээх күрэхтэһиини үөскэтэн таһаарбыттарын бэлиэтиир оруннаах. Чахчы норуот хамсаныыта диэххэ сөп.

Күрэхтэһии, биһиги улуу тренербит Д.П. Коркин турнирын кэнниттэн тута ыытыллыбыта саамай сөп. Туста кэлбит хамаандалар биир сырыы оҥорон, бэйэлэрэ даҕаны астынан барбыт буолуохтаахтар диэн киһи кэлтэй сэрэйэр. Бириистэр даҕаны баһырхайдар. Ыалдьыттарбыт Коркин, Крылов турнирдарыгар пьедесталга тахсан, этэргэ дылы, илии тутуурдаах, өттүк харалаах бардылар, эһиил даҕаны кэлиэхпит дэһэллэр. Ол, тэрээһин табыллыбытын мэктиэлиир.

Түмүккэ, биир дойдулааҕын, эрчийбит уолун, быраатын А.В. Крылов үтүө аатын үйэтитээри турниры көҕүлээбит ССРС спордун маастара, Саха сирин үтүөлээх тренерэ, Өймөкөөн улууһун бочуоттаах олохтооҕо, Д.П. Коркин аатынан СР государственнай бириэмийэтин лауреата Прокопий Семенович Иванов уонна Дьокуускай куорат спортивнай тустууга федерациятын салайааччы, көҥүл тустууга спорт маастара Николай Константинович Адушинов – бу күрэхтэһии тэрээһиннээх, үрдүк таһымнаах буоларын туһугар элбэхтэ сүүрбүттэрэ-көппүттэрэ, тэрийбиттэрэ түмүктээх буолбутун бэлиэтиир хайаан да наада.

Норуот күүһэ – көмүөл күүһэ! Бу курдук биир санаанан салайтаран үлэлээтэхпитинэ-хамсаатахпытына, биһиэхэ барыта табыллыа. Бары бииргэ буолуохха!

Петр ПАВЛОВ.