Борис Сдвижковтуун көрсүһүү

М.К. Аммосов аатынан Хотугулуу-Илиҥҥи федеральнай университекка, быйылгы Дыгын оонньууларын уонна Манчаары оонньууларын сахалыы дэгит күрэскэ муҥутуур кыайыылааҕа — Борис Сдвижкову кытта аһаҕас көрсүһүү тэрилиннэ. 

Борис билигин идэтинэн ДЮСШ-ҕа оҕолору саха дэгит көрүҥнэригэр дьарыктыыр, тириэньэр быһыытынан үлэлии-хамсыы сылдьар эбит. Кини бу биир сайын иһигэр Дыгын оонньууларын уонна Манчаары оонньууларын муҥутуур кыайыылааҕа буолбута элбэҕи этэр, спортсмен киһи олоҕор умнуллубат историческай түгэн, үрдүкү чыпчаал, историяҕа бэйэн ааккын-суолгун умнуллубаттыы үйэлэргэ тиһии. Саха успуордун историятыгар өссө Дыгыны, Манчаарыны субуруччу кыайа сылдьыбыт Николай Дьяконов баар.

Профессиональнай успуорт уопсайынан хайдах курдук сыралааҕын, дьиссипилиинэни эрэйэрин, бэйэ кыаҕын тургутарын туһунан тоһоҕолоон Борис Сдвижков истээччилэргэ өссө төгүл эттэ: «Быйыл 16 кыттааччы буолбута мин санаабар үчүгэй, герой элбиир, араас улуустартан уолаттар киирэллэр, көрөөччү да элбиир», — диэн санаатын үллэһиннэ. Түмүгэр: «эһиги инники күөҥҥэ саха тылын, литературатын үөрэтэ сылдьар дьон сахабыт тылын пропагандалаан, онон үлэҕитигэр, үөрэххитигэр ситиһиилэри баҕарабын», — диэн алгыс тылын эттэ.

Кырдьык, эдэр дьон, ыччат чөл олоҕу тутуһар, успуордунан дьарыктанан эти-сиини чэбдигирдэр, сырдыкка, ырааска дьулуһар, инникитигэр эрэллээх, көрүүлээх, үөрэххэ тардыһыылаах, төрөөбүт төрүт тылынан ыраастык сайа саҥарар эрэ буоллаҕына, саҥа саҕахтары арыйарыгар, олох хайа баҕарар араас өттүгэр өйдүүн-санаалыын сайдыылаах киһи буолан тахсар.

Онон, Борис Сдвижков курдук дэгиттэр, чаҕылхай, сэмэй дьону кытта атах тэпсэн олорон көрсөн, ирэ-хоро кэпсэтэн-ипсэтэн, киһи күүһүгэр күүс, сэниэтигэр сэниэ, билиитигэр билии эбинэр.

Милена АНДРЕЕВА, М.К. Аммосов аатынан Хотугулуу-Илиҥҥи федеральнай университет 3-с куурсун студентката.