Бастыҥнар Егор Сидоров-Пеле бирииһигэр оонньуохтара

Хамаҕатта “Эрчим” спорт саалаҕа сэтинньи 22 күнүгэр мини-футболга улуустааҕы комплекснай спартакиада суотугар киирэр күрэхтэһии буолла.

Тоҕус нэһилиэктэн хамаанда туран күн устата оонньоото. Нам сэлиэнньэтин хамаандата бэйэтин бөлөҕөр төһө да уустуктары көрүстэр, улууска бастыҥынан ааҕыллар Хатыҥ Арыы хамаандатын 2:1 ахсаанынан хотон, финалга тахсан оонньуур чиэстэммитэ.

Никольскай нэһилиэгин чиэһин көмүскүүр эдэр эрчимнээх уолаттартан турар хамаандаҕа 1:4 ахсаанынан сабырыйтаран, иккис миэстэ буолары ситистэ. Үһүс миэстэ иһин Хамаҕатта уонна Хатыҥ Арыы оонньообутуттан, хатыҥ арыылар ахсааны 4:0 оҥороннор боруонса мэтээллэри кэттилэр.

Түөрт бастыҥ хамаанда аны ахсынньы 6-7 күннэригэр буолуохтаах Егор Прокопьевич Сидоров-Пеле бирииһигэр республикатааҕы күрэхтэһиигэ, Нам улууһун чиэһин көмүскүү кыайыы иһин айанныаҕа.

“Күрэхтэһиигэ кыайыы биллэн турар, хайа хамаанда төһө уһуннук бииргэ оонньуу үөрүйэҕиттэн, оонньооччулар бэйэ-бэйэни өйдөһүүлэриттэн кэлэр. Холобура, кыайыылаахтартан Ринат Маслов үчүгэй оонньуута хамаандатын бастыырга таһаарда”, – диир мини-футболу кыра-эрдэхтэриттэн оонньоон саҕалаабыт уолаттары барыларын кэриэтэ билэр “Лидер” спорт киин дириэктэрэ Иван Яковлев.

Харысхан ПОПОВ.

Нам.