Виктор Рассадин эрэли сахта!

Бөҕөстөрбүт Кавказка ыытыллыбыт күрэхтэһиилэргэ кыттыыларын сырдатыыны “Дьулурҕаҥҥа” салгыыбыт. Тустуубут төрдүс күнүгэр Чечняҕа, Ахмат-Хаджи Кадыров кэриэһигэр норуоттар икки ардыларынааҕы күрэхтэһии быһаарыылаах хапсыһыылара буоллулар.

Инникини хатылаабакка туран, бөҕөстөрбүт бээтинсэҕэ тустууларын билиһиннэрдэххэ, бастаан «санааны уоскутар» бөлөххө Хотугу Осетияттан кыттар Эрчимэн Баппаҕай (125 кг) азербайджанец Гантемировка 1:2 ахсаанынан хотторон, күрэхтэһииттэн туораата.

Оттон күрэхтэһии тосхолун быһыытынан бары ыйааһыннарга үһүс бириистээх миэстэлэр иһин тустуулар буоллулар. Манна 92 киилэҕэ биһиги хамаандабыт начаалынньыга Ньургун Сергин Казахстан тахсан эрэр талааннаах тустууга, соторутааҕыта аан дойду улахан дьоҥҥо чемпионатыгар бэһистээбит Камиль Куруглиевы 2:0 ахсаанынан баһыйа тутта. Онон кэнники сылларга эриэ-дэхси көрдөрүүлэнэр Ньургун Сергин боруонса мэтээлинэн наҕараадаланна.

Бу күн саамай кэтэспит киһибит Виктор Рассадин (70 кг) биһиги эрэлбитин түһэн биэрбэтэ. Улахан үөрүйэхтээх киһи быһыытынан кини быһаарыылаах хапсыһыыга эдэрдэргэ Азия кыайыылааҕа, 20 саастаах иранец Эбрахим Элахины 7:4 ахсаанынан кыайан, бастакы миэстэни эрэллээхтик хааччынна.

Манна сыһыары тутан эттэххэ, Виктор бу түһүлгэҕэ наһаа табыллан, аһыллан туһунна. Кими даҕаны үрүҥ хараҕын өрө көрдөрбөтө диэххэ сөп. Ол курдук, казах Жаксалыковы 11:0, москвич Кажаровы 10:0, казах Досжановы 11:0 уонна бүтэһиккэ иранец Элахины 7:4 ахсааннарынан эрэллээхтик кыайталаата. Онон, бу күрэхтэһиигэ кини түөрт тустууга – 39 баалы сүүйдэ, 4 баалы сүүйтэрдэ. Бу үчүгэй көрдөрүү. Загребтааҕы хотторуу кэнниттэн, санаа түһүүтүн өрө көтөҕөн, кини бэйэтин кыайыытынан саха тустуута билигин даҕаны күүстээҕин көрдөрдө. Инникигэ эрэли үөскэттэ.

Түгэнинэн туһанан кыайыылаах Виктор Рассадины уонна кини тус тренерэ Артур Константинович Константиновы эҕэрдэлиибит! Биһиги бөҕөстөрбүт Кавказтааҕы сырыыга, Хадарцевтар тустууларыгар – биир үрүҥ көмүс (Константин Капрынов), биир боруонса (Лев Павлов); Кадыров тустуутугар – биир кыһыл көмүс (Виктор Рассадин), биир боруонса (Ньургун Сергин) мэтээллэри ылбыттарынан, Вадим Семенов баһылыктаах Саха сирин көҥүл тустууга хамаандатын тренердэрин эҕэрдэлиибит! Бу ситиһии инники үрдүк кыайыыларга үктэл буолуохтун.

Аны улуу тренер Дмитрий Петрович Коркин кэриэһигэр тустууну эрэнэ кэтэһэбит.

Күрэхтэһии түмүк көрдөрүүтэ:

57 кг: 1. Абубакар Муталиев, 2. Магомед Газигандов, 3. Юнус Явбатиров (үһүөн Дагестан), Мухаммет Каравус (Турция).

61 кг: 1. Абасгаджи Магомедов, 2. Муслим Мехтиханов, 3. Халид Магомедов (үһүөн Дагестан), Рустам Жилясов (КБР).

65 кг: 1. Адам Архиев (Чечня), 2. Рамазан Ферзалиев (Дагестан), 3. Ислам Гусейнов (Беларусь), Рашид Бабазаде (Азербайджан).

70 кг: 1. Виктор Рассадин (Таджикистан), 2. Эбрахим Элахи (Иран), 3. Магомед-Эми Эльтемиров (Чечня), Санжар Досжанов (Казахстан).

74 кг: 1. Иналбек Шериев (КБР), 2. Исмаил Ханиев, 3. Азнаур Таваев (иккиэн Дагестан), Сейфулла Итаев (Чечня).

79 кг: 1. Маламагомед Гамзатов, 2. Магомедмурад Яхьяев, 3. Касум Касумов, Саид Сайдулов (бары Дагестан).

86 кг: 1. Аманула Расулов (Дагестан), 2. Рамзан Булатов (Чечня), 3. Абдулкерим Абдулаев (Дагестан), Осман Гочен (Турция).

92 кг: 1. Тажитин Акаев (Дагестан), 2. Юсуп-Хаджи Айдаев (Чечня), 3. Асхаб Саадуллаев (Дагестан), Ньургун Сергин (Саха сирэ).

97 кг: 1. Сулейман Карадениз (Турция), 2. Шамиль-Имам Гаджиалиев, 3. Гаджимагомед Тажудинов, Ахмед Магамаев (үһүөн Дагестан).

125 кг: 1. Абдулла Курбанов (Дагестан), 2. Зелимхан Хизриев (Чечня), Юсуп Батырмурзаев (Казахстан), Хакан Буюкчингил (Турция).

Санатан эттэххэ, Кадыров тустуутун бириискэ пуондата 200 тыһ. американскай долларга тэҥнэһэрэ. Ол иһигэр, бастаабыкка — 5 тыһ, иккистээбиккэ — 3 тыһ, үһүстээбиттэргэ — 1 тыһ. доллар туттарылынна. Кыайыылааҕы бэлэмнээбит тренергэ — 2 тыһ. доллар.

PS: Ини-бии Хадарцевтар кубоктарын уонна Кадыров кэриэһигэр тустуу туһунан инники сырдатыылары манна dzulurgan.ru ааҕыҥ, бөҕөстөрбүт биирдиилээн тустууларын видеотын манна t.me/dzulurgan көрүҥ. 

Петр ПАВЛОВ.

Руслан Бадалов хаартыската.