Тэрилтэ үлэһиттэрэ буулдьанан ытыыга күрэхтэстилэр

Нам сэлиэнньэтигэр комплекснай спартакиада чэрчитинэн, тэрилтэлэр буулдьанан ытыы көрүҥэр күрэхтэстилэр. Общественник дьиэтигэр барыта 4 киһилээх 23 хамаанда кэлэн ытан барда.

Электроннай лазернай ытыыга улахан тэрилтэлэртэн 13 хамаанда бастыыр иһин кииристэ. Оттон дьоҕус тэрилтэлэртэн 10 хамаанда турда. Бэлиэтээн эттэххэ, аҥардас “Сахатранснефтегаз” тэрилтэ икки хамаанданы аҕалан ыттарда. Дьону тылгар киллэрэн икки хамаанданы туруоруу судургу буолбатах. Оттон дьоҕустарга, ытыыга эрэ буолбакка, буолар күрэхтэһиилэргэ баҕа баарын биллэрэллэр: “КУБит” тэрилтэ, “Чэчир”, “Теремок”, “Кыталык” уһуйааннар, социальнай харалта тэрилтэлэрэ.

Нам сэлиэнньэтигэр сыл устата ыытыллыбыт комплекснай спартакиада көрүҥнэригэр биири да көтүппэкэ күрэхтэһэр 10-ча үлэһиттээх “КУБит” тэрилтэни холобурга аҕалан чорботор сөп. Электроннай лазернай ытыыга дьахталларга уонна эр дьоҥҥо бастыҥынан ааттаналлар: улуустааҕы үөрэх управлениеттан ыппыт Татьяна Гуляева – 98; Ньургун Тимофеев аатынан республикатааҕы Олимпийскай эрэл оскуолаттан Никита Бочуров – 98.

Икки бөлөҕүнэн буолбут күрэхтэһиигэ бэрт эрийсиилээх, бүтэһигэр диэри долгутуулаах киирсиилэр буолан ааспыттара бигэргэнэр.

Улахаттарга, салайааччыларын кытта кэлбит ытааччылар бары 300 очукуоттан олох түһэрбэтилэр! Улуус дьаһалтата маҥнайгынан кэлэн ытыы былаанкатын 383 очукуоҕа диэри үөһэ таһаарбытын ОМВД хамаандата 17 очукуонан сиппэтэ. Кинилэр кэннилэриттэн эмиэ бэрт аҕыйаҕынан, 13 очукуонан хаалан Намнааҕы алын кылаас оскуолатын үлэһиттэрэ таҕыстылар. Бу үчүгэй көрдөрүү – улуус дьаһалтатын үлэһиттэрэ: Светлана Никонова – 97, Тит Васильев – 97, Анна Кутукова – 95, Филипп Васильев – 94.

Күүрээннээх киирсии кыра тэрилтэлэргэ салҕанна. Эрэллээх кыайыыны Ньургун Тимофеев аатынан республикатааҕы Олимпийскай эрэл оскуолата сурунна (352 очко): Никита Бочуров – 98, Владислав Попов – 80, Диана Готовцева – 80, Ульяна Данилова – 94. Үрүҥ көмүс мэтээллэри “Солнышко” (326 очко) уһуйаан ытааччылара кэттилэр.

Боруонса мэтээл иһин дьэ, “абытайдаах” киирсии ойуур хаһаайыстыбатын уонна “КУБит” тэрилтэлэр икки ардыларыгар буолла – 310-нуу очкону ыланнар тэҥнэстилэр. Бүтэһигинэн ыппыт “КУБит” миэстэлэһии балаһыанньатын тосту уларытта: ытааччы 96 очкону көрдөрбүт хаачыстыбата быһаарда. Оттон ойуур хаһаайыстыбатыттан бастыҥ ытыы – 93 очко. Ити курдук, 3 эрэ очконан хаачыстыбанан баһыйан “КУБит” кыайыыга дьулуурун көрдөрдө, ыалдьааччыларга үөрүүнү бэлэхтээтэ.

Хамсааһын баар буолан үгүс тэрилтэ кыттыыны ылар. Хамсааһын туохтан буоларый? Урукку сыллартан күрэхтэһиилэргэ оҥкулу ууран саҕалаабыт: элбэх киһи кыттарын ситиһэргэ үлэлэспит, угуйбут, маассабаһы өрө таппыт дьонтон биирдэстэрэ – “Лидер” спорт киинин салайааччыта Иван Яковлев. Ол эрээри, намнар болҕомтолорун тус бэйэ эрэ үлэтэ тахсарыгар буолбакка, уопсай сүрүн үлэ тахсарыгар уураллар, кыһаллаллар. Биһиги күүспүт манна олоҕурар!

Харысхан ПОПОВ, Нам.

Ааптар хаартыскалара.