Түһүлгэттэн – түһүлгэҕэ…

Бу күннэргэ Кавказ сиригэр-уотугар биир кэмҥэ көҥүл тустууга икки улахан түһүлгэ ыытылла турар. Иккиэннэрин састааптара куһаҕана суох. Сорохтор, бэҕэһээ Владикавказа хотторбуттар Чечняҕа тиийэн сэрэбиэйи аастылар. Холобур, уоскутар бөлөххө киирэр эрэлин сүтэрбит Александр Авелов, тута Грознайга айаннаабыт.

Биир өртүнэн ол сөп ээ. Эдэр бөҕөстөргө билигин маннык таһымнаах күрэхтэһиилэргэ кыттан, хапсыһыылары ыытан – тустар үөрүйэхтэрин байыталлара туһалаах буолуоҕа. Биирдэ ылан көрдөххө уонна сэрэйдэххэ, Россия бөҕөстөрө бары аны кыһын Иван Ярыгин турнирыгар кыттарга бэлэмнэниилэрин саҕалаатылар. Маннык күрэхтэһиилэр кинилэргэ – Красноярскайдааҕы түһүлгэҕэ ситиһиилээхтик кыттарга биир түһүмэх курдук сыаналанар. Онон, бөҕөстөртөн наһаа элбэҕи ирдиир сыыһа буолуо дии саныыбын.

Ол эбэтэр, Россия бөҕөстөрүгэр сыл саҥатыгар Ярыгин турнирыгар ситиһиилээхтик тустан, Европа чемпионатыгар кыттар дойду сүүмэрдэммит хамаандатын састаабыгар киирии уонна сайын Россия чемпионатыгар кыттан, аан дойду чемпионатыгар холоһуу сүрүн сыал-сорук быһыытынан турара өйдөнөр.

Чуолаан бу, Хотугу Осетияҕа уонна Чечняҕа буолар күрэхтэһиилэринэн сибээстээн, үгэс быһыытынан бу кэмҥэ ыытыллар Коркин тустуутун болдьоҕун сэтинньигэ (14-16.11.2025) көһөрөн биэрбиттэр диэн таайыахха сөп. Бу икки түһүлгэҕэ кыттыбыт бөҕөстөрбүт биир соруктара – дьиэлэригэр, Коркин турнирыгар кыттарга, ситиһиилэнэргэ диэн буолуохтаах.

Дьэ онон, алтынньы 2-3 күннэригэр Чечня Республикатын киин куоратыгар – Грознайга, Ахмат-Хаджи Кадыров кэриэһигэр көҥүл тустууга норуоттар икки ардыларынааҕы күрэхтэһии тэриллэр.

Манна биһиги бөҕөстөрбүт эмиэ кытталлар. Сэрэбиэй номнуо ыытылынна. Бастакы эргииргэ бөҕөстөрбүт кимнээҕи кытта киирсэллэрэ маннык:

57 кг Любомир Ашеин – Б.Исраилов (Москва)

61 кг Александр Авелов – М.Картбай (Казахстан)

70 кг Виктор Рассадин – Б.Жаксалыков (Казахстан)

92 кг Ньургун Сергин – Д.Исхаков (Казахстан)

125 кг Эрчимэн Баппаҕай – А.Курбанов (Дагестан), Никита Хабаров – М.Гантемиров (Азербайджан).

Түһүлгэ тосхоло:

Алтынньы 2 күнэ, чэппиэр

17:00. Бары ыйааһыннарга барыллааһын хапсыһыылар.

01:00. Финалга тахсар иһин хапсыһыылар.

Алтынньы 3 күнэ, бээтинсэ

17:00. Уоскутар бөлөх тустуулара уонна боруонса мэтээл иһин киирсиилэр.

23:30. Күрэхтэһиини үөрүүлээхтик аһыы.

00:15. Бары ыйааһыннарга быһаарыылаах хапсыһыылар.

PS: Кэлин биллибитинэн, Александр Авелов тустубат буолбут.

Хаһан баҕарар буоларыныы, бөҕөстөрбүтүгэр эрэнэбит, ситиһиини баҕарабыт! Күрэхтэһии хаамыытын “Дьулурҕан” хаһыат dzulurgan.ru сайтыгар уонна t.me/dzulurgan телеграмҥа ханаалыгар тутатына көрүөххүтүн-билиэххитин сөп.

Петр ПАВЛОВ.