Спартакиада тэтимин ылла

«Саха Бэчээт» тэрилтэтин идэлээх сойууһун (бэрэссэдээтэл К.А. Борисов) көҕүлээһининэн, тэрилтэ салалтатын (генеральнай дириэктэр Н.М. Стручкова) өйөбүлүнэн, Бэчээт дьиэтигэр бу тэрилтэ үлэһиттэрин Спартакиадалара ыытылла турар.

Номнуо дуобакка, саахымакка, хабылыкка, хаамыскаҕа, дартска күрэхтэһиилэр түмүктэннилэр. Аны остуол тенниһигэр, буулдьанан ытыыга, оҕунан ытыыга уонна киберспорка күрэстэр күүтэллэр. Манна даҕатан, «Саха Бэчээт» тэрилтэтигэр чөл, чэгиэн-чэбдик олоҕу тутуһууну, физическэй култууранан уонна спордунан дьарыктаныыны өрө туталлар диэххэ сөп.

«Саха Бэчээт» спартакиадатын көрүҥнэринэн түмүгэ:

Дуобакка: 1 миэстэ – Виктор Эверстов, 2 миэстэ – Ирина Васильева, 3 миэстэ – Анна Прудецкая.

Хабылыкка-хаамыскаҕа: 1 миэстэ – Анастасия Новгородова; 2 миэстэ – Антонина Борисова; 3 миэстэ – Луиза Томская.

Дартска: 1 миэстэ – Евгений Макаров; 2 миэстэ – Луиза Томская; 3 миэстэ – Ариан Григорьев.

Саахымакка: 1 миэстэ – Андрей Исаков; 2 миэстэ – Константин Борисов; 3 миэстэ – Айаал Христофоров.

Спартакиада тэтимин ылла. Кыттааччылар өссө элбээн, бу тэрээһиҥҥэ өссө көхтөөхтүк ылсан кытталларыгар, кистэнэ сылдьар ис кыахтарын арыйалларыгар баҕарабыт. Санатан эттэххэ, күрэхтэһии кыайыылаахтарын уонна иккис-үһүс миэстэ буолбуттары наҕараадалааһын ахсынньыга буолуоҕа.

«Олимпиада – олимпиецтарга эрэ буолбатах» диэн бэргэн этиигэ дьүөрэлээтэххэ, «үлэлээн иитиллээччилэр эмиэ үчүгэй, күүстээх күрэсчиттэр» диэххэ сөп. Ханныгын да иһин, маннык тэрээһиннэр тэрилтэ дьонун түмэллэрэ, сомоҕолууллара мэлдьэҕэ суох.

Петр ПАВЛОВ, күрэхтэһии сүрүн судьуйата.