Константин Капрыновка эрэнэбит!

Владикавказ куоракка албан аатырбыт ини-бии Аслан уонна Махарбек Хадарцевтар ааттарынан көҥүл тустууга норуоттар икки ардыларынааҕы иккис күрэхтэһии ыытылла турар. Маҥнайгы күн түмүгүнэн биһиэннэриттэн Константин Капрынов бастакы, Лев Павлов үһүс миэстэ иһин тустар буоллулар.

Бу түһүлгэҕэ уолаттарбыт хайдах тустубуттарын билиһиннэрэр буоллахха, бастакы эргииргэ Федор Постников (57 кг) азербайджанец Мохаммад Ализадеҕа 1:1 ахсааҥҥа хотторуулааҕынан ааҕылынна. Манчаары Ильинов (61 кг) эмиэ итинник ахсаанынан бурят Баяндуевка хотторон кэбистэ. Онон хоннохторун сатаан аспатылар диэххэ сөп.

Биир эрэммит киһибит, И.Ярыгин турнирыгар уонна Россия чемпионатыгар миэстэлэспит Александр Авелов – Тамерлан Караевы (Ставрополь) очукуонан ыраастык кыайан баран, финал 8/1-гэр дагестанец Анзор Мажидовка 0:3 ахсаанынан сабырыттарда. Салгыы күрэхтэһиигэ Мажидов – Алик Хадарцевка хотторон, уолбут суола сабыллан хаалла. Онон Авелов күрэхтэһииттэн тохтуурга күһэлиннэ.

Бары эрэнэ кэтэһэр бөҕөспүт Лев Павлов (57 кг) сэрэбиэй быһыытынан бастакынан, били быйыл сайын Москваҕа, Россия чемпионатыгар хотторбут утарсааччыта – Хабиб Мехтихановы (Дагестан) кытта туһунна. Уонна бу сырыыга хорсун санаатын киллэрэн, хапсыһыыны сытыытык саҕалаата. Ол курдук, бастакы түһүмэххэ киһитин атаҕыттан ылан охторон түһэрэн баран, тута «накат» диэн албаска эргитэлээн, ахсааны 8:1 оҥоро оҕуста. Ол гынан баран, иккискэ киирэн ити ылбыт баалларын харыстаан, наар көмүскэниигэ сырытта. Биирдэ атахха киллэттэрдэ, иккитэ көбүөр таһыгар астарда. Онон, бастакы түһүмэххэ ылбыт баалларыгар эрэнэн 8:5 ахсаанынан хотто. Итинэн, били хотторуутун боруостаата.

Манна даҕатан эттэххэ, бөҕөстөрбүт тустууларын “Дьулурҕан” хаһыат t.me/dzulurgan диэн телеграмҥа ханаалыгар көрүөххүтүн сөп.

Финал чиэппэригэр Лев, Ф.Постниковы хоппут азербайджан эдэр бөҕөһүн 4:0 ахсаанынан баһыйа тутта. Оттон финалга тахсар иһин тустууга Россия бу ыйааһыҥҥа биир күүстээх бөҕөһө, Ставропольтан кыттар дагестанец Рамиз Гамзатовы кытта тустуутугар эмиэ наһаа кэтэнэн туһунна, илиитэ-атаҕа аһыллыбата. Бүтэһик сөкүүндэлэргэ дьэ түһүөлүү сатаата да, бириэмэ бүтэн хаалла. Онон 1:3 ахсаанынан хоттордо.

Ол да буоллар, Лев Павлов – боруонса мэтээл иһин тустар кыахтанна. Кини утарсааччытынан Агашеринов (Россия) – Бобоев (Таджикистан) хапсыһыыларын кыайыылааҕа буолуоҕа.

Ол оннугар И.Ярыгин турнирын, Россия чемпионатын иккис миэстэлээҕэ Константин Капрынов (70 кг) тустууну таптааччылары сэргэхситтэ. Бастаан улахан үөрүйэхтээх Г.Колиевы (Беларусь) 7:5, оттон К.Корнеевы (Кемерово) 9:0, финалга тахсар иһин киирсиигэ таджик М.Ахмедовы 8:0 ахсааннарынан эрэллээхтик кыайталаата. Быһаарыылаах киирсиигэ кини утарсааччыта, үчүгэйдик билэр киһитэ – дагестанец Курбан Шираев. Кинини биһиги бөҕөспүт кэнники сылларга кыайталаабыта. Бу да сырыыга кыайарыгар эрэнэбит.

Быһаарыылаах хапсыһыыларга көрсүөхтэрэ:

57 кг А.Идрисов (Дагестан) – Р.Гамзатов (Ставрополь)

61 г А.Хадарцев – А.Гобаев (иккиэн Хотугу Осетиялар)

65 кг Д.Кизинов (Хотугу Осетия) – А.Абдуллаев (Калининград)

70 кг К.Шираев (Дагестан) – К.Капрынов (Саха сирэ)

74 кг И.Ганишов (Дагестан) – А.Кудзоев (Хотугу Осетия)

79 кг О.Сулдхуу (Монголия) – Д.Куприн (Кемерово)

86 кг А.Найфонов (Хотугу Осетия) – А.Цокаев (Азербайджан)

92 кг М.Малачдибиров – А.Мирзабеков (иккиэн Дагестантан)

97 кг К.Пшеничников (Кемерово) – А.Кцоев (Хотугу Осетия)

125 кг Ш.Мусаев (Дагестан) – С.Хинчагов (Хотугу Осетия).

Бүгүн Хадарцевтар кубоктарын күрэхтэһиитэ Дьокуускай бириэмэтинэн 17:00 саҕаланар. Бастаан “уоскутар бөлөх” тустуулара буолуохтара. Ол кэнниттэн бары ыйааһыннарга үһүс бириистээх миэстэ иһин тустуулар ыытыллыахтара. Оттон быһаарыылаах хапсыһыылар түүн 00:15 саҕаланаллар.

Хаһан баҕарар буоларыныы, бөҕөстөрбүтүгэр эрэнэбит, ситиһиини баҕарабыт! Күрэхтэһии хаамыытын “Дьулурҕан” хаһыат dzulurgan.ru сайтыгар уонна t.me/dzulurgan телеграмҥа ханаалыгар тутатына көрүөххүтүн-билиэххитин сөп.

Петр ПАВЛОВ.