Киһи кэмнээх, балык ыамнаах

Дьэ, түүннэри икки күрэхтэһиини тэҥҥэ көрөр сылаалаах эбит. Билэргит курдук, бу күннэргэ Хотугу Осетия-Алания Республикатыгар албан аатырбыт ини-бии Аслан уонна Махарбек Хадарцевтар кубоктарыгар итиэннэ Чечня Республикатыгар Ахмад-Хаджи Кадыров кэриэһигэр көҥүл тустууга норуоттар икки ардыларынааҕы турнирдар ыытылыннылар.

Хадарцевтар тустуулара бүттэ, оттон Кадыров күрэхтэһиитэ бүгүн түмүктэнэр.

Владикавказ көбүөрүгэр

«Дьулурҕаҥҥа» бу күрэхтэһиилэри сырдатыыны салгыыбыт. Маҥнай, Владикавказтааҕы тустуу туһунан. Иннинээҕи суруйууну хатылаабакка туран, күрэхтэһии хаамыытын бэрээдэгинэн билиһиннэрдэххэ, бэҕэһээ – алтынньы 2 күнүгэр Лев Павлов (57 кг) үһүс бириистээх миэстэ иһин тустууга Москваттан кыттар эдэркээн бөҕөс Агашерин Агарешиновы 3:1 ахсаанынан кыайда. Манна сыһыары тутан эттэххэ, Агашеринов иллэрээ сыл манна, олимпийскай чемпион Павел Пинигин оҕолорго күрэхтэһиитигэр кэлэн бастаабыта.

Быһаарыылаах хапсыһыылары түүн үөһэ быһа көрдүбүт. Манна биллэн турар, биһиги болҕомтобут барыта Константин Капрыновка этэ. Кини 70 киилэҕэ бастакы миэстэ иһин бэркэ билэр киһитэ – дагестанец Курбан Шираевтыын туһунна. Санатан эттэххэ, быйылгы сылга киирэн баран Константин кинини бастаан Ярыгин түһүлгэтигэр 9:6 уонна Россия чемпионатыгар 4:3 ахсаанынан сирэй көрсөн кыайталаабыта. Бу да сырыыга кыайарыгар эрэнэр этибит. Ол кыаллыбата. Тэҥ киирсиигэ албас оҥороору бэйэтэ утары хамсаныыга түбэһэн хаалан, түмүккэ 2:6 ахсаанынан хотторон кэбистэ.

Чэ, ону өссө төгүл «Дьулурҕан» телеграмҥа ханаалыгар баар видеоны көрөөрүҥ. Бэйэҕит сыаналаарыҥ.

Онон Хадарцевтар тустууларын түмүгүнэн Константин Капрынов иккис, Лев Павлов үһүс миэстэлэри ыллылар. Аны бүгүн Кадыров тустуутун кэтэһэбит.

Капрынов хотторуутуттан абатыйан “Киһи кэмнээх, балык ыамнаах” диэххэ. Этэргэ дылы, биһиги даҕаны бөҕөстөрбүт уулуссаларыгар бырааһынньык кэлиэҕэ.

Грознай көбүөрүгэр

Кадыров кэриэһигэр биһигиттэн биэс бөҕөс туһунна. Соторутааҕыта аҕай Санкт-Петербурга буолбут студеннар күрэхтэһиилэригэр кыттан иккис миэстэлэммит Никита Хабаров (125 кг) азербайджанец М.Гантемировка 0:4 ахсаанынан баһыйтарда. Ыарахан ыйааһыҥҥа иккис киһибит, Хотугу Осетия хамаандатыттан кыттыбыт Эрчимэн Баппаҕай – Россия чемпиона Абдула Курбановка (Дагестан) 0:7 ахсаанынан хоттордо.

57 киилэҕэ Любомир Ашеин бастаан Б.Исраиловы (Москва) 11:10 ахсаанынан кыайан баран, салгыы күрэхтэһиигэ дагестанец М.Сайпудиновка 3:4 хотторон кэбистэ.

Быйыл Россия чемпионатыгар бэһис буолбут Ньургун Сергин (92 кг) күрэхтэһиини үчүгэйдик саҕалаабыта. Бастаан казах Д.Исхаковы бэркэ даҕаны сахалыы хапсаҕай албаһын туттан, утарсааччытын атахха тэбэн сууллараат, ыраастык ууран кэбиспитэ. Иккис эргииргэ аны дагестанец Г.Гасановы 2:0 ахсаанынан хотто.

Оттон финалга тахсар иһин тустууга көбүөр хаһаайына Айдаевы кытта туһунна. Билэргит курдук, Россия чемпионатыгар боруонса мэтээл иһин тустууга Сергин чуо бу бөҕөскө мөккүөрдээх хапсыһыыга сабырыйтаран турар. Онон эрдэттэн тыҥааһыннаах киирсии буолара күүтүллүбүтэ. Ол эрээри, хомойуох иһин, бу да сырыыга Ньургун хотторон кэбистэ, 1:7 ахсаанынан.

Ол оннугар, улахан үөрүйэхтээх бөҕөспүт, Парижтааҕы-2024 Олимпиадаҕа 74 киилэҕэ бэһис миэстэлээх, быйыл Азия чемпионатын үрүҥ көмүс призера Виктор Рассадин – ыалдьааччыларын сэргэхситтэ. Виктор – казах Жаксалыковы 11:0, Россия эдэрдэргэ кыайыылааҕа Кажаровы (Москва) 10:0 уонна финалга тахсар иһин тустууга казах Досжановы 11:0 ахсаанынан чаҕылхайдык кыайталаата. Кини тустуутун көрдөххө, ити утарсааччыларыттан маастарыстыбатынан лаппа үрдүк кэрдиискэ турара көһүннэ. Онон аа-дьуо сылдьан кыайталаата.

Бу ыйааһыҥҥа ким кыайарын быһаарсыыга Виктор утарсааччытынан иранец Эбрахим Элахи буолла.

// Эбрахим Элахи быйыл 20-гэр диэри саастаах бөҕөстөргө Азия күрэхтэһиитин кыайыылааҕа, аан дойду түһүлгэтин үһүс миэстэлээҕэ.

Дьэ онон, Грознай көбүөрүгэр бүгүн Виктор Рассадин 70 киилэҕэ иранец Элахилыын бастакы, Ньургун Сергин (92 кг) үһүс миэстэ иһин, Куруглиев (Казахстан) – Жабраилов (Молдова) киирсиитин кыайыылааҕын кытта уонна Эрчимэн Баппаҕай (125 кг) «санааны уоскутар» бөлөххө азер Гантемировтыын тустуохтара.

Ахмат Кадыров кэриэһигэр күрэхтэһии иккис күнүнээҕи хапсыһыылара бүгүн 17:00 чааска «уоскутар бөлөх» тустуутунан саҕаланаллар. Оттон бүтэһик быһаарыылаах тустуулар түүн 00:15 чааска буолуохтара.

Хаһан баҕарар буоларыныы, бөҕөстөрбүтүгэр эрэнэбит, ситиһиини баҕарабыт! Күрэхтэһии хаамыытын “Дьулурҕан” хаһыат dzulurgan.ru сайтыгар уонна t.me/dzulurgan телеграмҥа ханаалыгар тутатына көрүөххүтүн-билиэххитин сөп.

Петр ПАВЛОВ.