Дуобакка бастыҥнар быһаарылыннылар

«Саха Бэчээт» тэрилтэ идэлээх сойууһун (бэрэссэдээтэл К.А. Борисов) көҕүлээһининэн, тэрилтэ салалтатын (генеральнай дириэктэр Н.М. Стручкова) өйөбүлүнэн, Бэчээт дьиэтигэр бу тэрилтэ үлэһиттэрин Спартакиадалара саҕаланна.

Тэрээһин сүрүн сыала – үлэһиттэр ортолоругар чөл олоҕу тарҕатыы, кинилэр чэгиэн-чэбдик буолууларын хааччыйыы, физическэй култууранан уонна спордунан дьарыктаныыны көҕүлээһин, спорт көрүҥнэринэн бастыҥнары сүүмэрдээһин уонна тэрилтэ хамаандатын талыы итиэннэ ГТО нуормаларын туттарыыга бэлэмнэнии буолаллар.

Спартакиада спорт тоҕус көрүҥэр: дуобакка, саахымакка, хабылыкка, хаамыскаҕа, Дартска, остуол тенниһигэр, буулдьанан ытыыга, оҕунан ытыыга уонна киберспорка биирдиилээн бастыыр иһин ыытыллар. Хас биирдии көрүҥҥэ күрэхтэһиини сүрүннээн тэрийэн ыытар судьуйалар ананнылар. Көрүҥнэр ахсын кыайыылаахтар уонна иккис-үһүс миэстэҕэ тиксибиттэри наҕараадалааһын сиэрэ-туома ахсынньы ортотугар, спартакиада күрэхтэһиитэ түмүктэммитин кэннэ ыытыллара былааннанар. Манна сыһыары тутан эттэххэ, бириистээх миэстэҕэ киирбиттэр мэтээллэринэн, грамоталарынан уонна харчынан наҕараадаланыахтара.

Ити курдук, “Саха Бэчээт” тэрилтэ идэлээх сойууһун уонна тэрилтэ спорка сыһыаннаах дьонун тэрийиилэринэн, алтынньы 22-23 күннэригэр спартакиада бастакы көрүҥэр – дуобакка күрэхтэһии ыытылынна. Манна судьуйанан Евгений Максимович Макаров үлэлээтэ. Барыта уон киһи кытынна. Балаһыанньа быһыытынан, оонньооччулар икки кыайыыга диэри дуобаттаатылар. Ол гынан баран, хас да түгэҥҥэ хардары-таары кыайсыылар буолбуттарын кэнниттэн үһүс быһарыылаах оонньуулар тэрилиннилэр. Бу – күрэхтэһии сытыытык барбытын, оонньооччулар таһымнара тэҥнэрин көрдөрөр дии саныыбын. Биир көрсүһүү икки оонньуу түмүгүнэн быһаарыллар диэтибит, ол оннугар иккитэ хотторбуттар туораан истилэр.

Түмүккэ кыайыылааҕынан “Забота-Арчы” хаһыат бас редактора Виктор Эверстов буолла. Кини биэс утарсааччытын кытта көрсөн барыта 9-та кыайда, 1-дэ тэҥнэстэ уонна 1-дэ хоттордо. Иккис миэстэни тэрилтэ экономикаҕа отделын үлэһитэ Ирина Васильева ылла. Үһүс бириистээх миэстэҕэ “Чолбон” сурунаал суруналыыһа Анна Прудецкая таҕыста. Салгыы миэстэлэри кадр отделыттан Алёна Кузьмина, экономика отделын салайааччыта Светлана Простакова, “УлусМедиа” корреспондена Луиза Томская, экономист Анна Готовцева, бухгалтер Маргарита Габышева, Семен Иванов, “УлусМедиа” корреспондена Зинаида Григорьева ыллылар.

Кыттыбыт дьоҥҥо тэрийээччилэр ааттарыттан барыларыгар махтанабыт уонна салгыы ыытыллар күрэхтэһиилэргэ өссө көхтөөхтүк кытталларыгар ыҥырабыт.

Этэргэ дылы, бэйэбит сынньалаҥмытын, тустаах үлэттэн таһынан сэргэхсийиибитин – бэйэбит тэрийэбит. Манна даҕатан эттэххэ, оонньуу үгэннээн бара турдаҕына, Бэчээт дьиэтигэр бэйэтин наадатыгар кэлэ сылдьар элбэх кинигэ ааптара Геннадий Тимофеевич Степанов сөҕө-махтайа көрөн: “Бу саамай сөпкө тэриммиккит. Киһи, үлэһит наар биир сиргэ олорон уһун күн устата аҥардас үлэтин боппуруоһунан эрэ дьарыктанара хобдох. Кыратык аралдьыйан маннык тэрээһиннэри ыытан, сэргэхсийэн, көх-нэм буолуу саамай сөп. Ол кэнниттэн үлэлиилэргэ даҕаны үчүгэй буолааччы”, — диэн санаатын эппитигэр сөбүлэһэбит.

Кырдьык даҕаны, элбэх үлэһиттээх, тус-туспа отделлаах улахан тэрилтэ дьоно бэйэ-бэйэлэрин кытта билсэллэригэр да, аа-дьуо сэһэргэһэллэригэр даҕаны маннык тэрээһиннэр туһалаахтар.

Дьэ онон күүстээх дуобатчыттар кимнээх буолаллара билиннэ. Кинилэр Саха сирин идэлээх сойуустарын спартакиадатыгар бэйэлэрин тэрилтэлэрин аатын көмүскүөхтэрэ. Инники маннык ыытыллыбыт күрэхтэһиилэргэ «Саха Бэчээт» тэрилтэ хамаандата эриэ-дэхситик кыттыбыта. Аныгыскы даҕаны күрэхтэһиилэргэ ситиһиилээхтик кыттарга оҥостор.

Аны тута сөрөөн тэрилтэ саахымакка күрэхтэһиитэ саҕаланна. Ити курдук, салгыы хабылыкка, хаамыскаҕа, Дартска… күрэхтэһиилэр тэриллэн иһиэхтэрэ.

Петр ПАВЛОВ, күрэхтэһии сүрүн судьуйата.

Ааптар хаартыскаҕа түһэриилэрэ.