Дьокуускай тустуута ыҥырар

Алтынньы 25 күнүгэр «Кыайыы 50 сыла» Спорт дыбарыаһыгар ССРС спордун маастара, Саха Республикатын үтүөлээх тренерэ Валерий Петрович Керемясов кэриэһигэр көҥүл тустууга Дьокуускай куорат аһаҕас чемпионата ыытыллар.

Хапсыһыылар сарсыарда 10:00 чаастан саҕаланаллар. Сэрэбиэй тардыыга барыта 112 бөҕөс кытынна. Кинилэртэн 15-һэ Россия спордун маастара. Чемпионакка сэттэ хамаанда: АГАТУ, СР Спорка бэлэмнэнии киинэ, ХИФУ, В.П. Керемясов аатынан 3 №-дээх спортивнай оскуола, Р.М. Дмитриев аатынан Олимпийскай эрэл училищета, Чурапчы уонна Сунтаар бөҕөстөрө күөн көрсөллөр.

Ыйааһыннарынан ылар буоллахха, 57 кг – 16, 61 кг – 21, 65 кг – 20, 70 кг – 22, 74 кг – 10, 79 кг – 11, 86 кг – 3, 86-тан үөһэ кг – 9 бөҕөс кыттар.

Оттон биллэр-көстөр бөҕөстөртөн кимнээх баалларый диэтэххэ, 57 кг – Кэскил Семенов, Иван Степанов, Данил Мохначевскай, Любомир Ашеин, 61 киилэҕэ – Алексей Копылов, Айаал Белолюбскай, Дамир Явловскай, Дьулус Петров, 65 киилэҕэ – Валентин Бурнашев, Яков Павлов, Артем Слепцов, Манчаары Ильинов, 70 кг – Владислав Кривошапкин, Николай Щеглов, Василий Григорьев, Виктор Яковлев, 74 кг – Игорь Матвеев, Анатолий Иванов, 79 киилэҕэ – Айсен Потапов, Владимир Бояновскай, 86 кг – Роман Николаев, ыарахан ыйааһыҥҥа – Никита Хабаров, Никита Софронов уо.д.а. күүстээх тустууктар бааллар.

Чемпионат сүрүн судьуйатынан – Бүтүн Россиятааҕы категориялаах судьуйа Владислав Кривошапкин, сүрүн суруксутунан – республикатааҕы категориялаах судьуйа Егор Друзьянов үлэлииллэр.

Барыгытын тустууга ыҥырабыт!

Петр ПАВЛОВ.