Денис Назаров бастакы лига кыайыылааҕа

Саахымат, дуобат дьиэтигэр 83-с төгүлүн бастакы лигаҕа Өрөспүүбүлүкэ саахымакка чөмпүйэнээтэ ыытылынна. Турнирга уопсайа 34 күрэсчит Сахабыт сирин араас муннуктарыттан кэлэн кыттыыны ыллылар. Кытаанах сытыы киирсии, мындыр өй, толкуй түмүгэр муҥутуур кыайыылааҕынан, бастыҥынан Мэҥэ Хаҥалас улууһун чиэһин көмүскүү сылдьар Денис Назаров таҕыста. Кини кыайыы очукуота – 7.

Салгыы иккис үктэлгэ Дьокуускайтан сылдьар, эмиэ 7 кыайыы очукуолаах Амуо Курилов таҕыста. Оттон үһүс бочуоттаах миэстэни 6,5 очукуолаах Чурапчы улууһуттан Николай Капитонов ылары ситистэ. Кыайыылаах уонна миэстэлэспиттэр, сэтинньи ыйга ыытыллыахтаах Саха сиринээҕи үрдүкү лига чөмпүйэнээтигэр кыттар  быраабы ыллылар.

Бу диэн санатан аһарар эбит буоллахпына, Денис Назаров – саахымат көрүҥүгэр спорт маастарыгар хандьыдаат,  улахан дьоҥҥо өрөспүүбүлүкэ икки төгүллээх чөмпүйүөнэ, призёра, оҕолорго Уһук Илиҥҥи федеральнай уокурук хас да төгүл хаһаайына. Кини саахыматы 5 сааһыттан сөбүлээн, астынан, баҕаран туран оонньуур, утумнаахтык 2-с кылаастан саҕалаан, Майа спорт оскуолатыгар Анастасия Иннокентьевна Харитонова, Ульяна Спиридоновна Шишигина, Гаврил Ильич Колосов салалталарынан дьарыктанан, күрэхтэһиилэргэ кыттан саҕалаабыта. Оттон кэлин, Владимир Мэндэевич Таппыровка эмиэ дьарыктаммыта. Билигин Денис Чурапчытааҕы култуура уонна спорт үнүстүүтүгэр үһүс кууруска үөрэнэр. Үрдүкү лигаҕа быйыл бэһис төгүлүн кыттыыны ылыахтаах.

Түмүктээн эттэхпинэ, саахыматы – биир саамай булугас, түргэн толкуйу, дьарыгы, тулууру, дьулууру эрэйэр, өйү-санааны сайыннарар, сынньар биир эмиэ олус ыарахан спорт көрүҥүн быһыытынан сыаналыыбын. Ол туһунан биллэр саахыматчыт Тигран Петросян маннык этэн турар:

«Шахматы — это прежде всего искусство, по форме игра, по содержанию — искусство, а по трудности овладения игрой — это наука» диэн.

Онон, кыайыылаахтарга, күрэсчиттэргэ туохтан да толлубакка, үрдүктэн үрдүк ситиһиилэри, чыпчааллары дабайан иһэллэригэр баҕарабын.

Милена АНДРЕЕВА, М.К. Аммосов аатынан Хотугулуу-Илиҥҥи федеральнай университет 3-с куурсун студентката.

Сардаана Кривошапкина хаартыскалара.