Чааһынай спортивнай кулууптар ситиһиилээхтик үлэлииллэр

Кэнники кэмҥэ Саха сиригэр, чуолаан киин куоракка чөл олоҕу эдэр ыччакка угуйар, эт-хаан, өй-санаа өттүнэн дьарыктыыр спортивнай кулууптар сылтан сыл элбииллэр, үүнэллэр-сайдаллар.

Хас биирдии күөн көрсүү күрэҕэр (буоксаҕа, кикбоксиҥҥа, самбоҕа о.д.а.) спортивнай кулууптар иитиллээччилэрэ үрдүк ситиһиилэнэллэр. Дьокуускайга билигин барыта холбоон 20-тэн тахса бойобуой искусствоҕа үөрэтэр хайысхалаах саалалар бааллар. Олортон ордук «Панчер», «Пикабу», «Спортбаза», «Темпл», «Файтлаб» диэн кулууптар араас таһымнаах күрэстэргэ ситиһиилэрдээхтэр.

Алтынньы 23 күнүттэн саҕалаан кикбоксиҥҥа оҕолорго уонна ыччаттарга үгүс элбэх күрэхтэһии ыытылынна. Олортон биирдэстэрэ, кикбоксиҥҥа ССРС спордун маастара Тытыгынаев Гаврил Борисович кэриэһигэр оҕолорго уонна юниордарга “фулл-контакт” көрүҥҥэ бастыҥы быһаарар турнир буолар.

Бу күрэскэ Дьокуускайтан, Бүлүүттэн, Намтан, Ньурбаттан, Нерюнгриттан, Тааттаттан 157 эдэр күрэсчит кыттыыны ылла. «Үгэс быһыытынан кикбоксинг күрэхтэһиилэрэ Дьокуускайтан эрэ буолбакка, республика оройуоннарыттан элбэх кыттааччыны түмэр. Эдэр кэскиллээх күрэсчиттэрбитигэр холобур оҥостор дьоммут үгүстэр. Соторутааҕыта Арассыыйа кикбоксинг лоу-кик хайысхатыгар сүүмэрдэммит хамаандатын хапытаана, Саха кикбоксинг оскуолатын биир саамай ситиһиилээх иитиллээччитэ Михаил Иванов аан дойду Кубогын хаһаайына буолбута», — диэн СӨ Олимпийскай эрэллэри бэлэмниир үөрэх кыһатын салайааччыта Александр Бугаев бэлиэтээн эттэ. Манна санаттахха, Михаил Иванов «Пикабу» буокса кулуубугар бэрт таһаарыылаахтык үлэлиир-хамсыыр.

Гаврил Тытыгынаев кэриэһигэр оҕолорго уонна юниордарга фулл-контакт көрүҥҥэ бастыҥы быһаарар турнир түмүктэрин туһунан СӨ кикбоксиҥҥа юниордарга сүрүн тириэнньэрин Сандал Чугуновы кытта кэпсэттим.

-Сандал, ыытыллыбыт күрэс туһунан кэпсээ эрэ. Күрэсчиттэр бэлэмнэрэ хайдаҕый?

-Алтынньы 23-24 күннэригэр өрөспүүбүлүкэтээҕи турнир ыыттыбыт. Манна кыттааччылар «лайт-контакт» (бу көрүҥҥэ ыарахан охсуу-тэбии көҥүллэммэт) диэн дисциплинаҕа күрэхтэстилэр. Бу көрүҥ татамига ыытыллар буолан, саҥа саҕалааччыларга ордук табыгастаах. Рингаҕа курдук муннукка хааллар куттал суох. Оттон алтынньы 26-27 күннэригэр ДЮСШ-1 буокса саалатыгар рингаҕа кыра оҕолор, 17-18 саастаах юниордар ортолоругар күүрүүлээх киирсиилэр буоллулар.

-Хамаанданан зачету ылан көрдөххө, ордук ханныктар ситиһиилэннилэр?

-Хамаанданнан ыллахха первенствоны Дьокуускай спортивнай кулууптара баһыйа туттулар. Ахсааннара да элбэх, хаачыстыбалара да үрдүк. «Пикабу» БК, Нам, Бүлүү хамаандалара үс бастыҥ иһигэр киирдилэр.

-Саҥа дьылга диэри кикбоксиҥҥа ханнык күрэстэр ыытыллалларый?

-Сэтинньигэ күрэстэр эмиэ бааллар, буолар күннэрэ чопчуланыаҕа, ахсынньыга Намҥа “Легран” (тутуу хампаанньатын бирииһигэр) диэн турнир ыытыллыаҕа. Бу күрэс сыл аайы ыытыллар буолуоҕа диэн кэпсэтиилэр бараллар.

-Сандал, хоруйдарыҥ иһин махтал! Үлэҕэр-хамнаскар үрдүк ситиһиилэри.

Күрэхтэһии түмүк көрдөрүүлэрэ:

13-14 саастаах кыргыттарга: Нарыйаана Егорова (36 кг, Бүлүү), Татьяна Григорьева (44 кг, Хатас), Надежда Иванова (52 кг, Нам).

13-14 саастаах уолаттарга: Антон Томскай (36 кг, Бүлүү), Николай Иванов (42 кг, Бүлүү), Евгений Залеснай (45 кг, PEEK-A-BOO), Дамир Софрончик (48 кг, PEEK-A-BOO), Всеволод Фоломеев (51 кг, Бүлүү), Денис Самойлов (54 кг, Нерюнгри), Антон Пахомов (57 кг, СК PUNCHER), Андрей Сивцев (60 кг, Нам), Евгений Дмитриев (63 кг, Дохсун СК), Денис Придатков (70 кг, СК PUNCHER Нерюнгри).

15-16 саастаах кыргыттарга: Саяна Горохова (44 кг, Өрөгөй СК), Камилла Корякина (52 кг, Бүлүү).

15-16 саастаах уолаттарга: Богдан Захаров (45 кг, Нам-Хатас), Радомир Спиридонов (48 кг, PEEK-A-BOO), Рустам Геокулов (51 кг, PEEK-A-BOO), Дмитрий Уральцев (54 кг, Хаҥалас), Данил Габышев (57 кг, Дохсун), Далаан Данилов (60 кг, Өрөгөй СК), Афанасий Мартынов (63,5 кг, Бүлүү), Тимур Авксентьев (67 кг, Нам), Ян Андриченко (71 кг, СК PUNCHER Нерюнгри), Данил Варламов (81 кг, СК PUNCHER).

17-18 саастаах кыргыттарга: Күннэй Петрова (52 кг, Өрөгөй СК), Влада Охлопкова (60 кг, Нам).

17-18 саастаах уолаттарга: Денис Баишев (51 кг, PEEK-A-BOO), Эрсан Бочкарев (54 кг, PEEK-A-BOO), Тимофей Николаев (57 кг, Өрөгөй СК), Николай Ефимов (60 кг, PEEK-A-BOO), Дьулустаан Кондаков (63,5 кг, Өрөгөй СК), Үөдүгэй Хатан (67 кг, PEEK-A-BOO), Николай Слепцов (71 кг, Өрөгөй СК), Алексей Алексеев (75 кг, Хатас).

Виталий БУСЛАЕВ – Долун Күндүл.

Хаартыскалары Сандал Чугунов тиксэрдэ.