Бу субуотаҕа – тустуу

Сахабыт сирин киин куоратын физическэй култуураҕа уонна спорка управлениетын начаалынньыга Эдуард Ефимов, Дьокуускай куорат спортивнай тустууга федерациятын бэрэссэдээтэлэ Николай Адушинов, СР физическэй култуураҕа уонна маассабай спорка управлениетын салайааччыта Роман Оконешников бигэргэтиилэринэн, алтынньы 24-25 күннэригэр ССРС спордун маастара, Саха сирин үтүөлээх тренерэ Валерий Петрович Керемясов кэриэһигэр Дьокуускай куорат көҥүл тустууга аһаҕас чөмпүйэнээтэ ыытыллар.

Тустуу киин куорат хабыллар хаба ортотугар – “Кыайыы 50 сыла” Спорт дыбарыаһыгар тэриллэр. Тосхол быһыытынан, алтынньы 24 күнүгэр – кыттааччылары бэлиэтээһин, судьуйалар уонна тренердэр сүбэ мунньахтара итиэннэ бары ыйааһыннарга сэрэбиэй ыытыллар. Манна сыһыары тутан эттэххэ, чөмпүйэнээт аҕыс ыйааһыҥҥа ыытыллар: 57, 61, 65, 70, 74, 79, 86 уонна 86-тан үөһэ киилэлэргэ.

Оттон алтынньы 25 күнүгэр – субуотаҕа, хапсыһыылар сарсыарда 10:00 чаастан саҕаланаллар. Күнүс 12:00 чаастан чөмпүйэнээти үөрүүлээхтик аһыы буолара күүтүллэр. Ити курдук, күрэхтэһии тохтоло суох ыытыллан, киэһэ кыайыылаахтары наҕараадалааһынынан түмүктэнэр. Ыйааһын ахсын бастакы, иккис, үһүс миэстэлэри ылбыт бөҕөстөр грамотанан, мэтээлинэн уонна өйдөбүнньүк бирииһинэн наҕараадаланаллар.

Санатан эттэххэ, былырыыҥҥы күрэхтэһии кыайыылаахтарынан буолбуттара: 57 кг – Любомир Ашеин (ЧГИФКиС), 61 кг – Яков Павлов (ХИФУ), 65 кг – Эдуард Попов (ЧГИФКиС), 70 кг – Игорь Матвеев (ОЭУ), 74 кг – Айсен Потапов, 79 кг – Анатолий Никитин (иккиэн ХИФУ), 86 кг – Виталий Ефремов (ЧГИФКиС), 92 кг – Степан Иванов (ОЭУ), 97 кг – Максим Толмачев (ХИФУ), 125 кг – Никита Валеев (ДЮСШ №3).

Быйыл дьэ кимнээх бастыыллар?

Петр ПАВЛОВ.