Бэтэрээн бөҕөстөрбүтүгэр эрэнэбит

Алтынньы 7-9 күннэригэр Венгрия Татабанья куоратыгар бэтэрээннэргэ көҥүл тустууга аан дойду чемпионата ыытыллар.

Бу улахан таһымнаах күрэхтэһиигэ Саха сириттэн эмиэ кытталлар. Ол курдук, Вадим Данилов (Е дивизион 56-60 саастаахтарга, 62 кг), Алексей Николаев (Д дивизион 51-55, 130 кг), Платон Саввинов, Дмитрий Шадрин (иккиэн В дивизион, 41-45 саастаахтарга, 88 кг), Андрей Иннокентьев (В дивизион, 41-45 саастаахтарга 62 кг) тахсыахтара. Биллэрин курдук, бэтэрээннэр күрэхтэһиилэрэ саастарынан араарыллыбыт биэс бөлөххө ыытыллар. Бөлөх аайы алталыы киилэ баар: 62, 70, 78, 88, 100, 130 кг. Бэтэрээнэр тустуулара — 4 мүнүүтэ.

Ол курдук, чемпионат бастакы күнүгэр — алтынньы 7 күнүгэр А.Иннокентьев, П.Саввинов, Д.Шадрин, В.Данилов (В уонна Е дивизионнар) киирсэллэр. Оттон алтынньы 8 күнүгэр — Алексей Николаев (Д дивизион) тустар. Син эмиэ былырыыҥҥытын курдук, кини көҥүл тустуу кэнниттэн гректии-римнии тустууга эмиэ күүһүн холоһор соруктаах.

Санатан эттэххэ, былырыын Хорватияҕа буолбут чемпионакка көҥүл тустууга Александр Румин бастаабыта, Семен Соркомов иккистээбитэ, оттон гректии-римнии тустууга Алексей Николаев үһүс буолбута.

Эдэрдии эрчимнээх бөҕөстөрбүтүгэр ситиһиилэри баҕарабыт уонна ыраах Венгрия сириттэн үчүгэй сонуннары кэтэһэбит.

Петр ПАВЛОВ.