Бөҕөстөрбүт Владикавказ көбүөрүгэр

Алтынньы 1-2 күннэригэр Хотугу Осетия (Алания) киин куоратыгар Владикавказка, Бырааттыы Аслан уонна Махарбек Хадарцевтар кубоктарыгар көҥүл тустууга норуоттар икки ардыларынааҕы күрэхтэһии ыытыллар.

Саха сириттэн бу түһүлгэҕэ Лев Павлов, Федор Постников (57 кг), Александр Авелов, Манчаары Ильинов (61 кг) уонна Константин Капрынов (70 кг) кытталлар.

Күрэхтэһии икки күн ыытыллар. Бастакы күн бары ыйааһыннарга финалга тахсыыга диэри хапсыһыылар буолаллар.

Сэрэбиэй түмүгүнэн Лев Павлов бастакы эргииргэ Хабиб Мехтихановы (Дагестан) кытта тустар. Хабиб – Муса уонна Муслим Мехтихановтар бырааттара. Кини быйыл Россия чемпионатыгар Леви 2:1 ахсаанынан кыайан турар. Бу сырыыга хотторууну боруостуурга!

57 кг ыйааһын сэрэбиэйигэр Лев – дагестанецтар Идрисов, Гамзатов кэннилэриттэн үһүс киһинэн талыллыбыт. Кини бөлөҕөр Гамзатов баар.

Ити курдук, бастакы эргииргэ, ол аата, финал 8/1-гэр Федор Постников – Мохаммад Ализадены (Азербайджан), Хотугу Осетияттын кыттар уолбут Алексей Антипин – Баир Шагдуровы (Бурятия) кытта киирсиэхтэрэ.

61 киилэҕэ быйылгы Ярыгин турнирын уонна Россия чемпионатын призера Александр Авелов бастакы эргииргэ Ставропольтан кыттар дагестанец Тамерлан Караевы утары тахсыаҕа. Манна хайалара кыайбыта арааһа салгыы күрэхтэһиигэ көбүөр хаһаайына Алик Хадарцевка тахсара буолуо. Бу бөҕөс Узбекистаҥҥа көһө сатаабытын Тустуу аан дойдутааҕы холбоһуга (UWW) аҕыйах хонуктааҕыта, саҥа киллэриллибит балаһыанньаҕа олоҕуран аккаастаата.

Оттон Манчаары Ильинов утарсааччыта – Баир Баяндуев (Бурятия).

Биир эрэнэр бөҕөспүт, быйылгы Ярыгин турнирын уонна Россия чемпионатын үрүҥ көмүс призера Константин Капрынов – Георгий Колиевы (Беларусь) кытта тустуунан күрэхтэһиини саҕалыыр. Бу ыйааһыҥҥа Капрыновы уонна дагестанец Курбан Шираевы, күүстээхтэр диэн туспа бөлөхтөргө араарбыттар.

Хаһан баҕарар буоларыныы, бөҕөстөрбүтүгэр эрэнэбит, ситиһиини баҕарабыт. Күрэхтэһии хаамыытын “Дьулурҕан” хаһыат dzulurgan.ru сайтыгар уонна тутатына t.me/dzulurgan телеграмҥа ханаалыгар көрүөххүтүн-билиэххитин сөп.

Күрэхтэһии тосхоло:

Алтынньы 1 күнэ, сэрэдэ

17:00 – Бары ыйааһыннарга барыллааһын хапсыһыылар: 57, 61, 65, 70, 75, 80, 86, 97, 125 кг.

01:00 – Бары ыйааһыннарга финалга тахсар иһин киирсиилэр.

Алтынньы 2 күнэ, чэппиэр

17:00 – Уоскутар бөлөх тустуулара уонна боруонса мэтээл иһин киирсиилэр.

23:30 – Күрэхтэһиини үөрүүлээхтик аһыы.

00:15 – Бары ыйааһыннарга быһаарыылаах хапсыһыылар. Муҥутуур кыайыылааҕы быһаарар түһүлгэ.

Петр ПАВЛОВ.