Андрей Иннокентьев уонна Вадим Данилов – пьедестал үктэлигэр

Эрдэ иһитиннэрбиппит курдук, Венгрия Татабанья куоратыгар көҥүл тустууга бэтэрээн-маастардарга аан дойду чемпионата ыытылла турар. Быйылгы түһүлгэҕэ Россия хамаандатын аатыттан Саха сириттэн биэс бөҕөс кыттар.

Чемпионат бастакы күнүгэр Вадим Данилов (Е дивизион 56-60 саастаахтарга, 62 кг), Платон Саввинов, Дмитрий Шадрин (иккиэн В дивизион, 41-45 саастаахтарга, 88 кг), Андрей Иннокентьев (В дивизион, 41-45 саастаахтарга 62 кг) туһуннулар. Манна даҕатан эттэххэ, Саввинов, Шадрин уонна Иннокентьев – аан дойду чемпионатыгар бастакы сүрэхтэниилэрэ.

Оттон маннык таһымнаах күрэхтэһиигэ кыттыбыт үөрүйэхтээх, 2017, 2021 — иккис, 2015 — үһүс буола сылдьыбыт спорт маастара Вадим Данилов утуу-субуу венгр Клеберы 10:7 ахсаанынан, монгол Сенгедоржу ыраастык кыайталаата. Салгыы эргииргэ кыргыз Эргашевка 5:9 хоттордо. Оттон боруонса мэтээли ким ыларын быһаарар хапсыһыыга казах Султановы очукуонан ыраастык (12:0) кыайда. Онон аан дойду түөрт (!) төгүллээх призерунан буолла.

62 кг Е дивизион: 1. Ремзи Осман (Болгария), 2. Убайдулло Эргашев (Узбекистан), 3. Вадим Данилов (Россия), Эдуард Иванов (Россия).

Соторутааҕыта аҕай Чечняҕа Кадыров аатынан күрэхтэһиигэ саха бөҕөстөрүгэр сүбэлээн-амалаан, тренер-секундант быһыытынан сылдьыбыт спорт маастара Дмитрий Шадрин бастаан итальянец Туаны 10:0 кыайан баран, иккискэ россиянин Р.Расуловка олох тэҥ киирсиигэ 5:6 ахсаанынан хомолтолоохтук хотторон кэбистэ.

Оттон тустуу уонна хапсаҕай маастара Платон Саввинов венгр Нагины 10:0, турок Калены 6:1 ахсааннарынан кыайталаан баран, кыргыз Сарыбаевка олох тэҥ киирсиигэ кыл мүччү 1:1+ хотторон кэбистэ. Салгыы үһүс миэстэ иһин тустууга Бессоновка (Латвия) 2:4 ахсаанынан сабырыйтарда.

Ити курдук салгыы билиһиннэрдэххэ, быйылгыттан бэтэрээннэр күрэхтэһиилэригэр кыттар Андрей Иннокентьев бастаан монгол Сугарга хотторбута. Оттон киһитэ финалга тахсыбытын иһин, Андрей «санааны уоскутар» бөлөххө киирэн молдован Л.Пентелейы 9:6 кыайан баран, үһүс бириистээх миэстэ иһин киирсиигэ казах Рахимбердины 5:0 ахсаанынан хотон, пьедестал үһүс үктэлигэр тахсары ситистэ.

62 кг В дивизион: 1. Кента Фуджимото (Япония), 2. Саянбаяр Сугар (Монголия), 3. Андрей Иннокентьев (Россия), Бен Вом Бауэр (АХШ).

Онон бастакы күн түмүгүнэн саха бөҕөстөрө Андрей Иннокентьев уонна Вадим Данилов – аан дойду чемпионатыгар үһүс миэстэлэри ылан, грамоталарынан уонна мэтээллэринэн наҕараадаланнылар. Эҕэрдэлиибит!

Аны бүгүн Алексей Николаев (Д дивизион 51-55, 130 кг) тустар. Кини былырыын бэйэтин ыйааһыныгар үс бастыҥнар ахсааннарыгар киирэн, номнуо бу түһүлгэ күүрээнин амтаһыйбыт, билбит бөҕөс. Быйылгы чемпионакка син эмиэ атыттар курдук, кини анал бэлэмнэниини баран, бу да сырыыга ситиһиилээхтик кыттарга суоттанар. Ситиһиилэри!

Петр ПАВЛОВ.