Алексей Николаев – аан дойду чемпиона!

Венгрияҕа, көҥүл тустууга аан дойду бэтэрээн-маастардарга чемпионата түмүктэннэ. Түһүлгэ иккис күнүгэр биһигиттэн спорт маастара Алексей Николаев туһунна. Кини 51-55 саастаахтарга 130 киилэҕэ кытынна.

Алексей, сэрэбиэй быһыытынан күрэхтэһиини финал чиэппэриттэн саҕалаабыта. Утарсааччытынан, бу иннинэ казах бөҕөһүн кыайбыт турок Мехмет Тогал этэ. Бу, киниттэн биир төбөнөн өндөс, бухатыыр көрүҥнээх киһини биһиги бөҕөспүт атахха киирэн тиэрэ көтөн баран, устунан илиитин кыбытан ыраастык кыайбыта.

Оттон финал аҥарыгар бэйэтинээҕэр намыһах уҥуохтаах эрээри, быдан халыҥ утарсааччытын – монгол Баянмунх Шураны кууһан ылан баран, туох да үөс батааскы биэрбэккэ, хаһыытаппытынан халбарыйан түһэрэн, иккис ыраас кыайыытын ситиспитэ.

Итинэн Алексей Николаев финалга тахсыбыта. Онно американец Джордж Портердыын көрүстэ. Сүрдээх тыҥааһыннаахтык барбыт хапсыһыыга, биир түгэҥҥэ харса суох санаатын киллэрэн, киһитин кууһан ылан халбарыйан быраҕан 4 баалы ылбыта. Манна даҕатан эттэххэ, үөһэттэн куустуһан быраҕыы – Алексей сөбүлээн туттар албаһа. Бу албаһа кинини элбэх тустууга абыраабыта. Онон түмүккэ 4:1 ахсаанынан кыайан, Алексей Николаев – көҥүл тустууга бэтэрээн-маастардарга аан дойду чемпионунан буолла!

PS: Алексей кыайыытын видеотын «Дьулурҕан» t.me/dzulurgan телеграмҥа ханаалыгар киирэн көрүөххүтүн сөп.

Чемпиону эҕэрдэлиибит! Алексей сааһыран иһэн тустуунан үлүһүйэн дьарыктаммыта. Кини ситиһиитигэр Россия уонна Саха сирин үтүөлээх тренерэ Иван Николаевич Сивцев улахан өҥөлөөх дии саныыбын. Көҥүл тустууга Дальнай Востокка чемпионнуу сылдьыбыта, маастар нуорматын толорбута. Кэнники сылларга кини тренер Федот Архипович Соловьев салалтатынан дьарыктанан, бэтэрээннэр тустууларыгар кыттар буолбута. Элбэх улахан таһымнаах күрэхтэһиилэргэ ситиһиилээхтик кыттыбыта. Былырыын аан дойду түһүлгэтигэр гректии-римнии тустууга боруонса мэтээли ылары ситиспитэ. Быйыл даҕаны тустуу ити көрүҥэр кыттар буолуохтаах.

Онон быйылгы аан дойду бэтэрээн-маастардарга чемпионатыгар биһиги бөҕөстөрбүт үс мэтээллэннилэр. Бастакы күн Андрей Иннокентьев уонна Вадим Данилов бэйэлэрин биир саастыылаахтарыгар үһүс бириистээх миэстэлэргэ тахсыбыттара. Иккис күн Алексей Николаев – чемпионнаата. Санатан эттэххэ, былырыын көҥүл тустууга Александр Румин бастаабыта. Онон Саха сирэ быйыл син биир чемпионнаах!

Петр ПАВЛОВ.