Аҕам саастаахтар күрэхтэһэн сэргэхсийэллэр

Нам сэлиэнньэтигэр Аҕам саастаахтар күннэрэ ыытылларынан, Общественник дьиэтигэр СаДуоБа уонна Дартс көрүҥнэригэр Ленскэй нэһилиэк аһаҕас турнирдара буоллулар.

Дартс көрүҥэр дротиктары быраҕыыга дьахталларга кыайыылааҕынан Раиса Негнюрова таҕыста, иккис Анна Гоголева, үһүс Варвара Охлопкова миэстэлэри ыллылар.

Бэйэлэрин саастыылаахтарыгар эр дьоҥҥо бу да сырыыга Иннокентий Данилов кыайыылааҕынан таҕыста. Иккис Владислав Корякин уонна үһүс Афанасий Софронов буоллулар.

Саахыматы, дуобаты, баарыһы холбуур “СаДуоБа” турнирыгар аҕам саастаах дьон күн устата оонньоон кыайыылаахтары биллилэр. Бу көрүҥҥэ баарыс оонньуу элбэҕи быһаарарын күрэхтэһээччилэр бэлиэтииллэр. Сааһырбыт күрэхтэһээччилэр, толкуйдуур оонньуулары өрө тутааччылар күн устата биир сиргэ олорон күрэхтэһэллэригэр тулуур, дьулуур наада.

Дьахталларга Галина Иванова муҥутуур кыайыылаах буолла. Иккис Татьяна Евсеева уонна үһүс Светлана Емельянова буоллулар.

Эр дьоҥҥо кыайыылаах Егор Леонтьев, иккис үрдэлгэ Анатолий Матвеев уонна үһүс үрдэлгэ Николай Иванов таҕыстылар.

Бу күн сэргэхсийбит аҕам саастаах дьоммут Ленскэй нэһилиэк олохтоох дьаһалтатыгар махтанарын биллэрэр. Аҕам саастаах дьоммут бу курдук куруук дьарыктаах буолуҥ! Толкуйдатар оонньуулары куруук өрө тутуҥ, оҕолоргутун, сиэннэргитин, ыччаты угуйа, үөрэтэ туруҥ!

Харысхан ПОПОВ, Нам.

Ааптар хаартыскалара.