Үтүө өйдөбүнньүктэр

Бүгүн, алтынньы 16 күнүгэр Хаҥалас улууһугар төрүт аатын төннөрүү бэлиэ күнэ буолла. Санатан эттэххэ, 1992 сыллаахха улууска төрүт, Хаҥалас диэн аата төннөрүллүбүтэ. Ол иннинэ Орджоникидзевскай оройуона диэн этэ.

Бэлиэ күн чэрчитинэн Ытык Куллаты сиригэр – хаҥаластар киэн туттар дьонноругар Тыгын Тойоҥҥо уонна кини сыдьааннара Маһары Бозековка, Соппуруон Сырановка, Ылдьаа Шадриҥҥа өйдөбүнньүк бэлиэ оҥоһуктары үөрүүлээхтик аһыы сиэрэ-туома буолла. Ону тэҥэ, Хаҥалас улууһугар төрүт аата төннөрүллүбүтүнэн «Саргы түһүлгэтэ» култуура киинигэр дьаһалта көҕүлээһининэн үөрүүлээх мунньах итиэннэ “Тыгын Дархан” киинэни көрүү тэрилиннэ.

Хаҥалас сиригэр-уотугар үктэнээт, Туймаада хочотун туораан Эркээнигэ киириигэ киһи болҕомтотун тардан, хаҥыл аттаах хаҥаластар бас-көс киһилэрэ, саха норуотун бастакы орто үйэлэрдээҕи сирдьитэ Тыгын бойобуой атын миинэн ыалдьыттары көрсөрө ыраахтан көстөр. Пааматынньык үрдүгэ 4 миэтэрэ 30 см эбит.

Бу өйдөбүнньүк бэлиэлэри Покровскайдааҕы оҕо уус-уран айымньытын оскуолатын учуутала, худуоһунньук Алексей Андреев оҥорбут. Пааматынньыктар урут оҥоһуллубут Тойон кыыл өйдөбүнньүгүн ситэрэн-хоторон биэрэллэр уонна урукку историяны санаталлар. Бу курдук өбүгэлэрбит олорон кэлбит олохторун-дьаһахтарын туһунан үйэлээх өйдөбүнньүктэр оҥоһуллан бүтүн көрүүгэ-истиигэ туруоруллаллара – дьон өйүн-санаатын көтөҕүүгэ, историяны үөрэтиигэ, сиргэ-уокка болҕомтолоохтук сыһыаннаһыыга улахан туһалаахтара саарбахтаммат.

Айан дьоно бу былыргы олоҕу санатар өйдөбүнньүк оҥоһуктарга тохтоон, сүгүрүйэн, кэрэхсээн ааһаргар баҕарабыт.

Петр ПАВЛОВ.

Ааптар хаартыскалара.