Загреб-2025: Куонкурус хаамыыта

Эрдэ сырдаппыппыт курдук, көҥүл тустууга аан дойду чемпионатыгар анаан, тустууну таптааччыларга “Дьулурҕан” куонкурус тэрийдэ. Онно барыта 35 киһи кыттыыны ылбыта.

Бөөлүүн түүн, чемпионат бастакы кыайыылаахтара быһаарылыннылар. Ол курдук, 61, 70, 86 уонна 125 киилэлээхтэргэ кимнээх бастаабыттара билиннэ. Ити ыйааһыннарга туһааннааҕынан Завур Угуев (Россия), Йошиносуке Аояги (Япония), Захид Валенсия (АХШ), Амир Заре (Иран) кыһыл көмүс мэтээллэринэн наҕараадаланнылар.

Онон, бастакы түөрт ыйааһын түмүгүнэн – Айсен Молуков, Данил Данилов, Стас, Гаврил Скрябин, Гаврил, Егор Капитонов, Иван Иванов, Петр Захаров, Николай Черкашин 5-тии очукуоланнылар. Кинилэр үстүү чемпиону таайан 1-дии очукуону уонна иккис ыйытыыга Угуевы сөпкө этэн 2-лии очукуону суруннулар. Россияттан уонна Саха сириттэн ким даҕаны миэстэлэспэтэ. Онон куонкурус иккис уонна үһүс ыйытыыларыгар Угуевтан ураты, бу күн түмүгүнэн ким да сөптөөх хоруйу биэрбэтэ.

Аны дьэ бүгүн түүн атын түөрт ыйааһыҥҥа – 57, 74, 79, 92 кг чемпионнар ааттарын билиэхпит.

Санатан эттэххэ, куонкуруска бирииһи Роман Иванович Оконешников салайааччылаах Саха Республикатын физическэй култуураҕа уонна маассабай спорка управлениета туруорда.

«Дьулурҕан» куонкурса дьэҥкир, аһаҕас. Хас биирдии кыттааччы уонна атыттар даҕаны, куонкурус усулуобуйатын итиэннэ ким хайдах сабаҕалаабытын барытын сайтка киирэн https://dzulurgan.ru/2025/09/bolҕojuҥ-kuonkurus-kyajyylaahtary-taajyҥ-4 билгэлээһиннэри көрүөн, сыаналыан, ырытыан уонна сыыһа быһаарыы тахсаары гыннаҕына көннөрүөн да сөп.

Петр ПАВЛОВ.